У Купалаўскім тэатры ўпершыню хочуць паставіць інклюзіўны спектакль

У праекце ўдзельнічае Нобелеўская лаўрэатка Святлана Алексіевіч.

У сераду 15 студзеня на краўдфандынгавой платформе Ulej.by быў апублікаваны незвычайны праект. У ім сышліся нобелеўская лаўрэатка Святлана Алексіевіч, чэмпіён свету ў муай-тай і саліст Brutto Віталь Гуркоў, рок-гурт Nizkiz, а таксама два тэатры: сямейны інклюзія-тэатр «і» і Нацыянальны акадэмічны тэатр імя Янкі Купалы, паведамляе belmir.by.

Мэта нечаканай калабарацыі - прэзентаваць першы ў гісторыі інклюзіўны спектакль на галоўнай сцэне Купалаўскага ці падарыць юным акторам, у тым ліку дзецям з аўтызмам, адну з самых важных тэатральных сцэн Беларусі.

- Для любога дзіцяці выступаць на сцэне - вялікая падзея і нагода для гонару, - кажа мастацкі кіраўнік сямейнага інклюзія-тэатра «і» Ірына Пушкарова. - Выступ жа на такой значнай у маштабах краіны пляцоўцы, як галоўная сцэна тэатра імя Янкі Купалы, пакуль успрымаецца нашымі выхаванцамі як смелая мара ці амаль недасяжная казка. Вельмі хочацца, каб гэтая казка стала для іх рэальнасцю.

«Аднойчы ў вялізным горадзе» - беларускамоўная пастаноўка, заснаваная на сюжэце аповеду Ф.М. Дастаеўскага. Спецыяльныя 3D-дэкарацыі дапамагаюць эмацыйна прачуць гісторыю хлопчыка, які страціў сваю сям'ю і застаўся зусім адзін на халодных вуліцах вялікага горада без шанцаў на выратаванне...

Удзельнікі краўдфандынга могуць выбраць лот на свой густ: проста падтрымаць ініцыятыву, набыць квіток на спектакль або абраць больш эксклюзіўную опцыю.

Сярод апошніх - спецыяльная трэніроўка па муай-тай ад Віталя Гуркова, квіток на прэзентацыю новага альбома гурта Nizkiz, магчымасць наведваць усе прэм'еры Купалаўскага на працягу 2020-га года, а таксама запрашэнне ў VIP-ложу са Святланай Алексіевіч і чаяванне з пісьменніцай у тэатральным буфеце.

- Любыя інклюзіўныя ініцыятывы неверагодна важныя для сучаснага грамадства, - каментуе ўладальніца Нобелеўскай прэміі ў літаратуры Святлана Алексіевіч. – Між іншым, удзел у тэатральных пастаноўках разнявольвае і вучыць размаўляць любых дзяцей, у тым ліку дзяцей з аўтызмам. Я з задавальненнем паўдзельнічаю ў гэтым добрым праекце, і як краўдфандар, і як запрошаная госця.

Гэта не ўсе лоты ад беларускіх зорак, але астатнія арганізатары пакуль трымаюць у сакрэце - яны будуць з'яўляцца на працягу ўсёй краўдфандынгавай кампаніі.