Кіпр, Грэцыя ды Ізраіль падпісалі «гістарычнае» пагадненне аб газаправодзе

Трубаправод EastMed паменшыць энэргетычную залежнасць Еўропы ад Расеі.

2 студзеня ў Афінах прадстаўнікі Грэцыі, Кіпра ды Ізраіля падпісалі міжурадавае пагадненне аб будаўніцтве газаправода EastMed.

Пра гэта паведамляе "Еўрапейская праўда" са спасылкай на Cyprus Mail.

Прэзідэнт Кіпра Нікас Анастасіядзіс назваў гэты дакумент "гістарычным" і заявіў, што пагадненне стварае аснову для рэальнага ўзаемадзеяння.

"На Блізкім Усходзе павінна быць супрацоўніцтва, а не спаборніцтва, асабліва што тычыцца энэргетычных пытанняў або чаго-небудзь, што можа звязаць дзяржавы рэгіёну", - сказаў ён.

Трубаправод будзе праходзіць праз Міжземнае мора ад Ізраілю да грэцкай выспы Крыт і ў мацерыковай Грэцыі, а затым у Італію.

Пазней пагадненне будзе фіналізавана подпісам Італіі. У траўні прэм'ер-міністр Італіі Джузэпэ Контэ выказаўся супраць праекту "Пасэйдон", які з'яўляецца апошняй часткай трубаправода, які злучыў бы Грэцыю з Італіяй.

Кіпр, Грэцыя ды Ізраіль ўжо падпісалі дамову аб 1900 кіламетрах трубаправода ў пачатку гэтага года ў прысутнасці дзяржсакратара ЗША Майка Пампэа.

Чакаецца, што трубаправод EastMed задаволіць блізу 10% патрэб Еўропы ў прыродным газе, памяншаючы энэргетычную залежнасць ад Расеі.

ЕЗ унёс уклад у кошт тэхнічных даследаванняў для праекта.

Тры краіны-падпісанты далучыліся да агульнага супрацьдзеяння нядаўняму пагадненню Турцыі з прызнаным ААН урадам Лібіі, які вызначае "марскія межы" паміж дзвюма краінамі Міжземнага мора. Турцыя і Лібія геаграфічна далёкія адзін ад аднаго, і Грэцыя і Егіпет перашкаджаюць гэтаму.

Пагадненне разглядаецца як спосаб Турцыі замахвацца на дзель у марскіх рэсурсах усходняга Міжземнамор'я, нават калі гэта азначае замах на прастору іншых краін. Турцыя, са свайго боку, сцвярджае, што Грэцыя і Кіпр імкнуцца абмежаваць Турцыю яе вузкімі тэрытарыяльнымі водамі.