Мядзведзеў абвінаваціў санкцыі ў праблемах эканомікі РФ

Экс-прэм'ер РФ таксама паскардзіўся на нізкія кошты энэрганосьбітаў.

Намеснік кіраўніка Савета бяспекі РФ Дзмітрый Мядзведзеў заявіў, што ў цэлым задаволены тым, як працаваў урад пад ягоным кіраўніцтвам у 2012 - 2020 гадах, нягледзячы на шэраг балючых пастаноў і неразвязаных пытанняў. У інтэрв'ю Першаму каналу экс-прэм'ер адзначыў, што ключавой задачай новага кабінета міністраў пад кіраўніцтвам Міхаіла Мішусціна з'яўляецца рост рэальных даходаў грамадзян, піша finanz.ru.

«Я шчыра скажу, што як чалавек, які адказваў за працу ўрада амаль восем гадоў, я агулам задаволены, як ішлі справы, і як працаваў вышэйшы выканаўчы орган улады», - сказаў Мядзведзеў, падкрэсліўшы пры гэтым, што «канчатковыя ацэнкі заўсёды даюць людзі».

Ён адзначыў, што «былі і вельмі складаныя пастановы, балючыя», але неабходныя меры, напрыклад - пенсійная рэформа. «Былі і неразвязаныя задачы. <...> Я маю на ўвазе тое, што ў нас амаль не раслі рэальныя даходы [грамадзян]. Гэта, вядома, вынік агульнаэканамічнай сітуацыі, але гэтым трэба займацца. Пра гэта ўсе кажуць, казаў прэзідэнт [РФ Уладзімір Пуцін] ў пасланні [Федэральнаму сходу]. І гэта, напэўна, ключавая задача для новага ўрада», - сказаў намеснік кіраўніка Савета бяспекі РФ.

Са слоў Мядзведзева, ягоны ўрад працаваў у «выключна важны і складаны час»: другая хваля сусветнага фінансавага крызісу абрынула кошты энэрганосьбітаў, што, «натуральна, адразу ўдарыла па бюджэце, па шматлікіх праграмах»; за акупацыю Крыма былі санкцыі, якія «даволі балюча ўдарылі па эканоміцы», і ўрад стаў займацца імпартазамяшчэннем, «таму што цэлы шэраг тавараў быў адрэзаны ад нашай краіны». «З іншага боку, мы зрабілі стаўку на тое, каб замясціць многія тыпы тавараў, прадуктаў харчавання на нашых паліцах, на прылаўках крам і проста ствараць новыя расейскія прадукты і тавары. Гэта была таксама вельмі сур'ёзная і вялікая праца», - заўважыў Мядзведзеў.