Крах «нафтавага эмірата»

Вертыкаль улады паводзіла сябе так, як быццам Расея заўсёды будзе ў яе на пабягушках.

Эксперты аналітычнага цэнтра «Стратэгія» падвялі вынікі сацыяльна-эканамічнага развіцця Беларусі ў 2019 годзе, паведамляе «Брэсцкая газета».

«2019-ы год быў млявай, сумнай копіяй папярэдніх гадоў пятай (2016–2020) пяцігодкі. У тэарэтычнай платформе, змесце эканамічнай палітыкі, сістэме прыняцця пастановаў мінулы год нічым не адрозніваўся ад тыпавога года любой пяцігодкі», – так падводзіць вынікі сацыяльна-эканамічнага развіцця Беларусі ў 2019 годзе аналітычны цэнтр «Стратэгія».

Распараднікі чужога (палітыкі і чыноўнікі), на думку экспертаў, рабілі выгляд, што іх праца паляпшае птушачна-палкавую сістэму. Лукашэнка рабіў выгляд, што ён у гэта верыць, дазваляючы сабе тыповыя «жэстачайша», «спыніць дурніцу», «расхлябанасць», «бардак» і «ў кайданкі без суда і следства». Чыноўнікі ўсё гэта неяк санліва і лянотна запісвалі, без спалоху на твары, без энтузіязму ў вачах, без крэатыву ў планах. Таму прыманыя імі пастановы стракацелі нарматыўнай бязглуздзіцай тыпу «ўдасканальваць», «стымуляваць», «паскорыць», «умацаваць» або «забяспечыць устойлівасць».

Эканоміка краіны жыла сваім жыццём, а ўрад у шырокім сэнсе слова заставаўся на сваёй хвалі. Вертыкаль улады паводзіла сябе так, як быццам Расея заўсёды будзе ў яе на пабягушках, быццам бы нішто не пагражае статусу Беларусі «нафтавы эмірат» – без сваёй нафты. Урад рабіў выгляд, што яму заўсёды будуць пазычаць, заплюшчваць вочы на свавольствы з санкцыёнкай, нафтахімічнымі схемамі, кантрабандай і дэмпінгам.

2019 год стаў часам прадказальнага, убудаванага ў мадэль «Дзяржплан» пагаршэння якасці інстытутаў, фінансаў і чыннікаў канкурэнтаздольнасці. Кадравы голад у сістэме кіравання стаў не менш вострай праблемай, чым дэмаграфія і ўцёкі мазгоў.

2019 год стаў годам шматузроўневага краху. Стала відавочна, што беларуская эканоміка ў 5-й пяцігодцы (2016–2020) не дагоніць у тэмпах росту сярэднесусветныя.

2019 год стаў годам страчаных магчымасцяў у дэбюракратызацыі, дэкрыміналізацыі і дэтэнізацыі эканомікі Беларусі.