Іран не выходзіць з ядзернага пагаднення

Іран не выходзіць з ядзернай угоды, нягледзячы на зняцце абмежаванняў па ўзбагачэнні ўрану.

Пра гэта паведамляе «Новое время» са спасылкай на іранскае дзяржаўнае інфармагенцтва IRNA.

«Ісламская рэспубліка Іран застанецца ўдзельнікам шматбаковага ядзернага пагаднення і ўважае, што цяпер дасягнуты разумны баланс абавязанняў бакоў па ім», - заявіў намеснік міністра замежных спраў Абас Арагчы.

З ягоных слоў, «разумны баланс» быў парушаны пасля выхаду ЗША з пагаднення ў 2018 годзе, але цяпер Іран гатовы выконваць рэшту сваіх абавязанняў.

«Тое, што Іран памяншае свае абавязанні па ядзерным пагадненні, не азначае, што мы выходзім з яго», - гаворыцца ў растлумачэнні МЗС Ірана.

Арагчы таксама падкрэсліў, што ўважае недапушчальным аднаўленне еўрапейскіх санкцый супраць Ірана, як гэта было прадугледжанае першапачатковым пагадненнем, у адказ на яго рашэнне па ўзбагачэнні ядзернага паліва.

«Калі яны (еўрапейцы - рэд.) гэта зробяць або паставяць такія ўмовы, гэта будзе азначаць пачатак канца ядзернага пагаднення», - прыводзіць агенцтва пазіцыю іранскага МЗС.

Акрамя таго, сталы прадстаўнік Ірана пры ААН Маджыд Тахт-Раванчы заявіў, што Іран не плануе ствараць і не мае патрэбы ў ядзернай зброі.

5 студзеня стала вядома, што Іран зняў усе абмежаванні па ўзбагачэнні ўрану.

Гістарычнае пагадненне іранскай ядзернай праграмы было прынятае 15 ліпеня 2015 года. Іран абавязаўся дапусціць інспектараў Міжнароднага агенцтва атамнай энэргіі (МАГАТЭ) на свае ядзерныя аб'екты ў абмен на пакрокавае скасаванне заходніх санкцый.