Расея выйшла з кансультацый аб катастрофе «Боінга» MH17
18- 15.10.2020, 20:54
- 31,364
У Нідэрляндах цяпер ідзе судовы працэс паводле справы аб катастрофе.
Расея выйшла з трохбаковых кансультацый з Нідэрландамі і Аўстраліяй у пытанні аб катастрофе малайзійскага «Боінга» над Данбасам у ліпені 2014 года. Пра гэта гаворыцца ў паведамленні МЗС Расеі.
Расейскае знешнепалітычнае ведамства абгрунтавала сваё рашэнне тым, што Нідэрланды ў ліпені падалі ў Еўрапейскі суд правоў чалавека міждзяржаўную скаргу супраць Расеі ў сувязі з катастрофай «Боінга», які выконваў рэйс МН17. МЗС расцаніў гэта як сведчанне намеру «працягнуць заганны шлях аднабаковага ўскладання адказнасці за тое, што здарылася ў небе над Данбасам на Расею».
У заяве зноў выяўляецца недавер да высноў міжнароднага следства, паводле якіх «Боінг» быў збіты з ўстаноўкі «Бук», дастаўленай на падкантрольную сепаратыстам тэрыторыю Данецкай вобласці Украіны з расейскай вайсковай часці.
У заяве гаворыцца, што Расея, пагадзіўшыся на кансультацыі ў 2018 годзе, «зыходзіла з таго, што такія кансультацыі будуць спрыяць усталяванню з апорай на факты сапраўдных прычын авіякатастрофы рэйса МН17», аднак Аўстралія і Нідэрланды, як піша ведамства, «былі нацэлены толькі на тое, каб дамагчыся ад Расеі прызнання віны і атрымання кампенсацый для сваякоў загінулых».
Міністр замежных спраў Нідэрландаў Стэф Блок выказаў глыбокае шкадаванне ў сувязі з пастановай Расеі. Паводле яго слоў, Нідэрланды выступаюць за працяг перамоў, але пры гэтым не гатовыя адмовіцца ад іншых метадаў дасягнення справядлівасці паводле справы аб катастрофе.
— Stef Blok (@ministerBlok) October 15, 2020
Нідэрланды і Аўстралія раней заклікалі Расею прызнаць сваю адказнасць за катастрофу «Боінга».
У Нідэрляндах зараз ідзе судовы працэс паводле справы аб катастрофе. Абвінавачаныя - трое грамадзян Расеі і адзін грамадзянін Украіны, якія мелі дачыненне да сепаратыстаў, якіх падтрымлівае Расея на Данбасе. Ніхто з іх не ўдзельнічае ў працэсе асабіста і толькі адзін прадстаўлены адвакатамі. Працэс пачаўся ў сакавіку, следства коратка падала на ім сваю версію, але асноўная частка слуханняў яшчэ наперадзе - пакуль разглядаюцца шматлікія хадайніцтвы і іншыя тэхнічныя пытанні.