Валер Карбалевіч: Садысцкім разгонам мірных акцый кіруе асабіста Лукашэнка

І ён будзе адказваць за гэта.

На нарадзе 27 кастрычніка Лукашэнка заявіў, што аддаў загад аб разгоне мітынгоўцаў на Арлоўскай вуліцы ў Менску 25 кастрычніка, піша ў сваім тэлеграм-канале палітычны аглядальнік Валер Карбалевіч.

У сюжэце, паказаным на «Беларусь 1», Лукашэнка адзначыў:

«Гэта што, нармальна, калі натоўп п'яны, ашалелы, сколаты наркотыкамі, пракураны і прапіты, сотні чалавек, рынуліся ў гэтыя раёны? Што трэба было рабіць міліцыі? Гэта быў мой загад для таго, каб засцерагчы людзей».

Фактычна ж, акцыя пратэсту была абсалютна мірнай, пра што сведчаць усе, хто назіраў за гэтым мітынгам.

Увогуле, нічога сенсацыйнага Лукашэнка не сказаў. Кожны, хто даўно сочыць за функцыянаваннем беларускай «вертыкалі» ўлады, ведае, што ўсе важныя пастановы прымаюцца адным чалавекам. І нічога больш важнага за пратэсты ў краіне з 9 жніўня не адбываецца.

Але, тым не менш, прызнанне Лукашэнкі вельмі паказальнае. Гэта разбурае ілюзіі, якія захоўваліся ў некаторых беларусаў і замежных назіральнікаў. Маўляў, зверствы супрацоўнікаў праваахоўных органаў - гэта эксцэсы выканаўцаў.

Зараз усё стала на месца. Можна зрабіць цвёрдыя высновы, што ўсе дзеянні супрацоўнікаў МУС жорстка кантралююцца. Разгонам прынцыпова мірных акцый пратэсту кіруе асабіста Лукашэнка. І выкарыстанне спецсродкаў ажыццяўляецца выключна на ягоны загад. І гэты садызм сілавікоў 9-12 жніўня быў не выпадковым, а загадзя спланаваным. Гэта было часткай сцэнару здушэння волі да супраціву.

Дарэчы, Уладзімір Пуцін, выступаючы 22 кастрычніка на штогадовым сходзе міжнароднага дыскусійнага клуба «Валдай», згадваючы беларускія падзеі, сказаў:

«Так, і жорсткасць была, і ўсё, а можа быць, нават неапраўданая, але тады няхай адкажуць тыя, хто гэта дапусціў».

Зараз вядома, хто гэта дазволіў і загадаў.