У беларускіх школах бацькі перахапілі ініцыятыву і самі вядуць інфармацыйныя гадзіны

Дзяцей усцераглі ад прапаганды.

«Салiдарнасць» распытала бацькоў навучэнцаў і высветліла, што ў некаторых школах скасавалі класныя і інфармацыйныя гадзіны, каб не выклікаць бунт сярод бацькоў праз прапаганду дзяржаўнай ідэалогіі.

Дзіця Ганны (імя зменена на просьбу суразмоўніцы - заўв) вучыцца ў адной са слуцкіх школ.

- Усё пачалося 1 верасня, калі класны кіраўнік на першым уроку сказаў дзецям: паглядзіце, які ў нас выдатны прэзідэнт (паказаў партрэт на сцяне), гэта дзякуючы яму мы жывём у такой цудоўнай краіне, дзе ўсё добра і стабільна.

Настаўнік не бачыў некаторых дзяцей паўгода: яны пайшлі на самаізаляцыю праз каранавірус з сакавіка. Я не разумею, навошта было казаць пра прэзідэнта? Няўжо нельга было распытаць дзяцей, як яны прабавілі канікулы?

Калі на наступнай класным гадзіне настаўнік зноў закрануў палітычныя тэмы, я патэлефанавала яму і спытала, для чаго існуе класная гадзіну і папрасіла не ўцягваць дзяцей у палітыку. Ён сказаў, што ў яго ёсць план працы ад упраўлення адукацыі, і ён павінен яго пільнавацца.

Надоечы педагог папярэдзіў дзяцей: а сёмай (максімум а восьмай) гадзіне вечарам яны павінны быць дома, бо ў Слуцку праходзяць мітынгі.

Ганна хоча напісаць заяву на адрас адміністрацыі школы, каб яе дзіця не наведвала класныя гадзіны, але перажывае, як гэта адаб'ецца на яе сям'і.

«Лінейка 1 верасня нагадвала вечар у турэцкім гатэлі. Ніхто з адміністрацыі не ўзяў слова»

У старэйшых класах сталічнай 194-й школы ў гэтым навучальным годзе скасавалі класныя і інфармацыйныя гадзіны. На думку бацькоў, гэта звязана з фальсіфікацыямі выбараў і ўдзелам у іх настаўнікаў.

- Нягледзячы на тое, што на адным са школьных участкаў перамагла Ціханоўская, бацькі ўпэўненыя: быў укід бюлетэняў, бо перавага галасоў была невялікая, - распавядае Аліса, мама старшакласніка (імя змененае на просьбу суразмоўніцы - заўв). - У нас вельмі актыўныя школьныя чаты, людзі шмат выказваліся.

Настаўнікі жывуць у нашым мікрараёне, усе чыесьці суседзі. Дайшло да таго, што некаторыя сябры камісіі пачалі рабіць камінг-аўты і напісалі, што не маюць дачынення да ўкідкаў, і самі галасавалі за Ціханоўскую. Ёсць і тыя, хто маўчыць.

Лінейку 1 верасня Аліса параўноўвае з вечарам у турэцкім гатэлі:

- Былі нанятыя аніматары, якія патанчылі з дзецьмі. Потым навучэнцаў запрасілі ў класы. Ніхто з адміністрацыі школы не павітаў дзяцей.

Аліса мяркуе, што кіраўніцтва баіцца кантактаў з бацькамі пасля грамадскага абмеркавання ў школьных чатах.

- Мабыць, для таго, каб лішні раз не нарывацца, яны надумалі выключыць усе магчымыя кантакты. Агульнашкольнага бацькоўскага сходу не было, інфармацыйныя і класныя гадзіны не праводзяцца.

Дзецям забаранілі пісаць пра закрыццё Купалаўскага тэатра

- У верасні бацькі пацікавіліся ў класнага кіраўніка, як наконт палітыкі ў школе, - распавядае Крысціна (імя змененае - заўв), маці вучня гімназіі Першамайскага раёна Менска. - Нам адказалі, што ніякай палітыкі не будзе, дзеці ў сёмым класе.

Калі Крысціна папрасіла класнага кіраўніка даслаць спіс тэмаў, якія абмяркоўваюць на часах інфармавання, адказу яна не атрымала. Акрамя таго, што дзеці досыць дарослыя, каб самім разабрацца з гэтымі тэмамі. Мама напісала на адрас школы і неўзабаве атрымала адказ.

- Высветлілася, нармальныя тэмы, якія можна расказваць з любой ідэалагічнай пазіцыі. Пра Канстытуцыю, правы чалавека і гэтак далей. Адная з тэм была прысвечаная стагоддзю Купалаўскага тэатра. Дзецям, якім даручылі рыхтаваць даклады, сказалі пісаць пра першыя 99 гадоў існавання тэатра, не кранаючы апошніх падзей.

Крысціна мяркуе, што інфармацыйныя гадзіны могуць быць карысныя дзецям і новай Беларусі. На ейную думку, варта браць актуальныя тэмы, напрыклад, кіраванне фінансамі, складанне бюджэту на тыдзень, правы чалавека.

Як бацькі перахапілі ініцыятыву і самі вядуць інфармацыйныя гадзіны

Настасся і Раман Маладзяшыны ў самым пачатку навучальнага года прапанавалі бацькам весці інфармацыйныя гадзіны.

- Класная спытала дазволу ў дырэктара, тая не пярэчыла, - распавядаюць бацькі навучэнцаў адной з менскіх школ. - Адгадайце, якая колькасць бацькоў падпісалася да нас з мужам. Правільна - нуль.

Затое зараз мы расказваем дзецям пра усялякія карысныя ў жыцці штукі. Муж прэ эксэль і фінансавую пісьменнасці, я - пра маркетынг і hr-ах.

У класнай вызваліўся час. А мы даем дзецям выказвацца і разумеем, якія ж яны ўсе ментальна свабодныя і дзівосныя.