Расейская эканоміка паскорыла падзенне ў кастрычніку

ВУП абрынуўся на 4,7%.

Спад расейскай эканомікі прыкметна паскорыўся ў кастрычніку. За месяц ВУП РФ зменшыўся на 4,7%, вынікае з ацэнкі Мінэканамразвіцця на аснове звестак Расстата.

У параўнанні з вераснем (-3%) тэмпы рэцэсіі паскорыліся больш чым у паўтара раза, а назапашаным вынікам за 10 месяцаў эканоміка страціла 3,6%.

«Асноўны ўнёсак ва ўзмацненне спаду ў кастрычніку зрабілі апрацоўчая прамысловасць і сельская гаспадарка», - канстатуе МЭР у аглядзе дзелавой актыўнасці.

Фабрыкі і заводы па-за сыравіннай трубой у кастрычніку скарацілі выпуск на 4,4% - рэкордна з травеньскага перыяду непрацоўных дзён. Абрынуліся аб'ёмы вытворчасці ў металаапрацоўцы (-27,4%), вытворчасці кампутараў і электронікі (-15,5%), скуры і футра (-15,1%), а таксама загрузка НПЗ (-10,6%).

Прамысловасць агулам разам са здабыўной галіной упала на 5,9%, перапыніўшы павольнае аднаўленне, якое прадаўжалася з чэрвеня.

Выпуск сельгаспрадукцыі пачаў скарачацца ўпершыню з пачатку года, прычым маштабы спаду - 6,6% - сталі рэкорднымі за два гады. Збольшага гэта тлумачыцца эфектам базы, тлумачыць МЭР: год таму быў сабраны рэкордны ўраджай сланечніку і цукровых буракоў, паўтарыць які сёлета не ўдалося.

Глыбей у яму нырнуў транспартны сектар: спад пасажырскіх перавозак паскорыўся з 36,6% да 42,2%, а грузавых - з 3,9% да 4%, галоўным чынам за кошт аўтамабільных перавозак і трубаправодаў.

Пампаваць менш сыравіны даводзіцца праз угоду ОРЕС+, якая прымусіла нафтавікоў скараціць здабычу да ўзроўняў пачатку 2000-х, тады як пасажырскі транспарт пакутуе праз часткова закрытыя межы.

Грошы, зэканомленыя на замежным турызме, расейцы марнуюць у крамах. За кастрычнік спад продажаў нехарчовых тавараў запаволіўся да 1,1%, агулам абарачэнне розніцы ўпала на 2,4% год да года (супраць 3% у верасні).

Ілюзію дакрызіснага ўзроўню спажывання дапамагаюць падтрымліваць крэдыты, выдача якіх прадаўжае расці з двухзначнай хуткасцю (больш за 10% год да года), паказвае аналітык Райффайзенбанка Станіслаў Мурашоў.

Што тычыцца заробкаў, то яны згодна з Расстатам, аднавілі рост - 2,2% у верасні супраць 0,1% у жніўні. У кастрычніку заробкі падтрымае 3-адсоткавая індэксацыя ў бюджэтным сектары, на які прыпадае 25% усіх работнікаў у краіне, адзначае эканаміст ING аб Расеі з СНД Дзмітрый Далгін.

У прыватным бізнэсе справы ідуць куды горш: узровень рэальных заробкаў падае на 2,5%, чаго статыстыка не фіксавала ні разу з 2016 года.

Узровень беспрацоўя ў кастрычніку не змяніўся (6,3%), але агульная колькасць занятых - 70,3 мільёна чалавек - на 2,5%, або 1,8 мільёна чалавек застаецца ніжэйшай за дакрызісныя ўзроўні. Гэта тлумачыць правал рэальных наяўных даходаў амаль на 5% за трэці квартал, кажа Далгін.

Пакуль негатыў у эканоміцы ў большай ступені звязаны з адкладзенымі наступствамі першай хвалі COVID-19, мяркуе Мурашоў: спажыванне змарнавала значную частку рэсурсаў, і на падтрыманне хуткасці патрабуецца нешта новае - дадатковыя фіскальныя стымулы, паскарэнне крэдытавання або рост заробкаў, чаго пакуль не адбываецца.

«Аднак прамысловасць ужо пачала адчуваць «дыханне» ўнутранай другой хвалі. Напрыклад, скарачэнне вытворчасці бензіну ў кастрычніку - відавочны індыкатар зніжэння эканамічнай актыўнасці. Да канца года могуць праявіцца і вонкавыя эфекты ў выглядзе скарачэння попыту на экспартныя тавары», - папярэджвае экспэрт.

Ацэнка МЭР за кастрычнік - «крыху больш аптымістычная», пішуць аналітыкі «Промсувязьбанка». З іх прагнозаў, спад ВУП у чацвёртым квартале паскорыўся амаль удвая - да 5,5-6,5% «праз магчымы рост страт у сектары паслуг на фоне «другой хвалі» пандэміі».

Такі прагноз на мінулым тыдні даў ЦБ, паводле разлікаў якога эканоміка скончыць год спадам на 5% ці больш.