«Час нагадаць, што мы - людзі»: моцны зварот шахцёра-страйкоўца
5- 1.12.2020, 14:27
- 28,020
Віктар Гурыновіч запісаў відэа проста ў шахце.
Яшчэ адзін працоўны «Беларуськалія» далучыўся да страйку, паведамляе «Радыё Свабода».
Шахцёры патрабуюць адстаўкі Лукашэнкі, новых прэзідэнцкіх выбараў, вызвалення палітвязняў і спынення гвалту.
Падземны трактарыст 4-га рудніка Віктар Гурыновіч апублікаваў відэазварот, запісаны ў шахце:
«Наша Радзіма ў страшнай бядзе. І мы, яе дзеці, апынуліся ў самым сэрцы трагедыі! Сілавы блок выкарыстоўвае рэпрэсіі супраць свайго народа, супраць яго голасу, супраць мірнага пратэсту, супраць будучыні нашай Айчыны. Краіна задыхаецца ў хвалях незаконнага пераследу паводле палітычных прыкмет. Краіна задыхаецца ад хлусні і дыскрымінацыі нацыянальнай культуры і мовы.
Мы на мяжы гуманітарнай катастрофы: катаванні, здзекі, забойствы, гвалт у дачыненні да іншадумцаў, да простых людзей - гэта тое, што тут адбываецца кожны дзень. Гэта што, цывілізаваная краіна 21-га стагоддзя? Чаму так адбылося? Што стала апошняй кропляй? Чаму спружына больш не сціскаецца!?
Прычына адна - насельніцтва Беларусі стамілася трываць непрафесіяналізм, хамства і неадэкватнасць нелегітымнай улады, якая замест дыялогу прапануе толькі жорсткі ціск і агрэсію. Пара нагадаць, што мы - не быдла, мы - людзі.
Трэцяе дзесяцігоддзе нас прымушаюць маўчаць. Нам было страшна. І цяпер нам страшна. І ў будучыні страху не пазбегнуць. Не баіцца толькі хворы. Але маўчаць больш нельга. Я бачу толькі адзіны мірны шлях барацьбы за свае правы - далучэнне да агульнанацыянальнага страйку і падтрымка патрабаванняў страйку «Беларуськалія».
Беларусі жыць! Беларусам быць і заставацца людзьмі!», - заявіў Віктар Гурыновіч.
Як паведамляе страйкам салігорскага «Беларуськалія», колькасць страйкоўцаў на прадпрыемстве расце. Да палітычных патрабаванняў, сярод якіх адстаўка Лукашэнкі і новыя прэзідэнцкія выбары, 30 лістапада далучыліся:
Антаніна В’юхіна, аператарка заправачных станцый ПУУСТ 3-га рудніка,
Аляксандр Макаед, электраслесар дзяжурны і рамонту абсталявання 4-га рудніка,
Андрэй Батуеў, машыніст горных машын 3-га рудніка.
Усяго колькасць страйкоўцаў на «Беларуськаліі» набліжаецца да 100 чалавек.