«Праз нізкія заробкі ў таксі велізарная цякучка»

Таксіст з Горадні ананімна распавёў праўду пра заробкі і пасажыраў.

Таксіст з Горадні на ананімнай аснове згадзіўся расказаць аўтабізнэсу, як напраўду ідуць справы ў гэтай сферы, колькі можна зарабіць, працуючы на чужым аўто, і якія парушэнні часцей за ўсё сустракаюцца сярод таксістаў.

Па тры кіроўцы на адзін аўтамабіль

Са слоў суразмоўцы, кіроўцы працуюць па двух схемах: альбо бяруць гатовы да працы аўтамабіль у арэнду, альбо атрымліваюць пэўны адсотак ад сумы выкананых замоў.

«На машынах, дзе працуюць ад працэнтаў, як правіла, ездзяць тры кіроўцы. Графік - па 12 гадзін: два дні, дзве ночы, адсыпны, выходны. Працуючы па такім графіку, кіроўца атрымлівае 30 працэнтаў агульнай сумы за замовы. Усе выдаткі, уключаючы паліва, кладуцца на ўладальніка аўто, - распавядае Канстанцін. - Арэнда машыны, абсталяванай прапанам, каштуе 30-35 рублёў на 12 гадзін, адпаведна суткі арэнды абыходзяцца 60-70 рублёў. Аўтамабілі на метане трохі даражэйшыя, недзе рублёў 80».

Таксіст з Горадні аддае перавагу працаваць паводле працэнтнай схемы, бо, на яго думку, пры працы ўначы ў буднія на арэндзе можна спрацаваць у нуль альбо наогул сысці ў мінус.

«У будні па начах працы мала, мінімум што выходзіла - 47 рублёў. Як вынік за 12 гадзін працы атрымаў 14 рублёў. Па начах працы шмат толькі ў выходныя дні. Тады за ноч можна накруціць 200-250 кіламетраў. У звычайныя ночы прабег складае 100 -150 кіламетраў. Днём прабегі блізу 200 кіламетраў, у выхадныя - 250. Калі выходзіць паездка ў Ліду ці Шчучын, то дзённы прабег лёгка перавальвае за 300 кіламетраў».

Таксіст распавядае, што апошнія месяцы работы стала менш. Цяпер у сярэднім у месяц ён зарабляе 600-650 рублёў. Яшчэ рублёў 50 у месяц можа прыбавіцца за кошт гасцінцаў. Усе працуюць па дамове падраду, гэта значыць ніякіх бальнічных або адпускных у кіроўцаў няма.

«Уладальнікам аўтамабіляў не важна, хто ездзіць за стырном»

«Тарыфы нізкія, горад перанасычаны аўтамабілямі-таксі. Іх колькасць толькі павялічваецца, таму заробкі працягваюць падаць. Праз нізкія заробкі ў таксі велізарная цякучка. На машынах любой службы пастаянна ёсць аб'явы пра тое, што патрабуюцца кіроўцы. Таму сёння ў таксі бяруць усіх запар. Не важна, які ў цябе стаж, як ты ездзіш, ці ведаеш горад...»

Па назіраннях суразмоўцы, цяпер у таксі працуе ўсё больш «малалетак», у якіх няма і двух гадоў стажу.

«Для многіх з іх гэта не проста праца, а лад жыцця - пастаянныя тусоўкі і рух. Моладзь атрымлівае машыну, нешта зарабляе плюс можа ездзіць на ёй па сваіх справах. У такіх кіроўцаў папулярна збірацца кампаніямі, каб з'ездзіць папіць кавы ці набіць каму-небудзь морду.

Уладальнікам аўто на вялікі рахунак не важна, хто ездзіць за стырном. Як правіла, усе машыны на КАСКО, у дадатак, калі аварыя адбываецца з віны кіроўцы, з яго ўсё роўна спаганяюць грошы за арэнду аўто, нібыта як няўстойку.

Таксама ў апошні час у таксі ідзе працаваць шмат дзяўчат. У іх ёсць перавага: дзяўчатам часцей пакідаюць гасцінцы, гэта можа быць 10-20 рублёў за змену.

Цяпер сярэдні чэк за паездку блізу 4,5 рубля. Хоць стае і тых, хто ўкладваецца па мінімуму. Студэнты, заказваючы таксі праз дадатак, за 2 рублі прымудраюцца з'ездзіць у краму за «дабаўкай» і назад».

«Падвязіце бліжэй, каб усе бачылі»

«Часта на таксі сталі ездзіць школьнікі. Скідваюць па 1-2 рубля і, як «крутыя», прыязджаюць на вучобу. Просяць: «Дзядзечка, падвязіце бліжэй да ўваходу, каб усе бачылі».

Ён сцвярджае, што цяпер у таксі многія ідуць працаваць толькі для таго, каб перачакаць некалькі месяцаў, пакуль не знойдуць нармальную працу: «Многія хлопцы вучацца на катэгорыі «С», «Е», каб потым уладкавацца на фуру у Польшчы ці Літве. А пакуль ідзе вучоба, каб хоць нешта зарабіць, ездзяць у таксі».

Яшчэ адна прычына цякучкі - неадпаведнасць абяцанняў, чаканняў і рэальнасці.

«Табе кажуць, што лёгка будзеш зарабляць не менш за 1000 рублёў, многія «вядуцца». Але за 2-3 месяцы разумеюць, што ўсё далёка не так, і звальняюцца. Акрамя таго, у шматлікіх пасажыраў да кіроўцы таксі стаўленне як да быдла, што робіць працу яшчэ менш прыемнай».

2 гады, а потым «матай» прабег і прадавай

«Каб зарабляць 1000 рублёў і больш, трэба ўвесь час працаваць з парушэннямі. Ёсць знаёмыя, якія за месяц на арэндных аўто зарабляюць па 1100-1200 рублёў. Але гэта трэба даслоўна жыць у машыне. Пачынаюць з 7 раніцы і да 22-23 гадзін. Нярэдка з падобнымі парушэннямі ездзяць і кіроўцы на сваіх аўто. Выпісваюць новыя шляхавыя - і наперад».

Кіроўца таксама распавёў, што часцей за ўсё аўтамабіль у таксі працуе два гады, праязджаючы за гэты перыяд 200-250 тысяч км.

«Потым ад машын імкнуцца пазбаўляцца. Натуральна, «адмотваюць» прабег і выстаўляюць на продаж. У залежнасці ад стану могуць намаляваць і 70 тысяч. Хоць сустракаюцца на лініі і машыны з прабегам больш за 300 тысяч кіламетраў».