7 красавiка 2020, aўторак, 16:56
Заставайся дома!
Рубрыкі

У Гомелі новыя падазрэнні на каронавірус

42
У Гомелі новыя падазрэнні на каронавірус

Медыкі ў ахоўных касцюмах павезлі некалькі чалавек.

Маладая дзяўчына, жыхарка Гомеля, на мінулым тыдні вярнулася з Францыі. На мяжы ў яе ўзялі мазок і адправілі дадому. Учора, 24 сакавіка, дзяўчыну забралі з падазрэннем на каронавірус. У пад'ездзе дома, дзе яна жыла, медыкі правялі дэзінфекцыю. На дзверы змясцілі абвестку.

«Іншапланецяне! Мы столькі адрэналіну атрымалі!»

Адна з жыхарак дома распавяла «Радыё Свабода» пра ўчорашнія падзеі.

АБВЕСТКА НА ДЗВЯРАХ ДОМА Ў ГОМЕЛІ

«Мы ўжо ведалі, што суседку нашу забралі. Чакалі медыкаў для дэзінфекцыі пад'езда. Але як убачылі іх, Божа мой! Іншапланецяне! Мы ўсе атрымалі адрэналіну. Працавалі яны аператыўна, старанна - усё апрацавалі, дзверы, вокны, ліфт, пляцоўку. Мы і да гэтага, па сваёй ініцыятыве, калі пачалася пандэмія, самі рабілі дэзінфекцыю з суседкамі па чарзе, усё мылі, са сродкамі», - кажа жанчына.

Цяпер у яе кватэры пахне хлоркай. Жанчына сама апрацоўвае памяшканне. Пра маладую суседку яна кажа, што тая ездзіла ў Францыю, прыкладна ў мінулую сераду вярнулася.

«Мы з суседзямі жывём дружна, але яе маці мы папярэдзілі, каб дзяўчына да нас не заходзіла, ці мала што, у нас маленькія дзеці. Маці дзяўчыны сказала, што вядома, яна ўсё разумее. І мы дзяўчыну не бачылі, толькі ведаем, што ўчора яе забралі», - адзначыла жанчына.

Раніцай 25 сакавіка, з яе слоў, прыехала «хуткая» за маці дзяўчыны, якая была ў Францыі.

«Звычайная «хуткая». Толькі калі яе саджалі ў машыну, то прапанавалі надзець маску», - успомніла суседка.

Яна сама звярталася ў паліклініку з тэмпературай. «Там вельмі аператыўна мне зрабілі аналізы, рэнтген, сказалі, што баяцца няма чаго, каронавіруса ў нас няма і быць не можа. Прымаюць хутка, арганізавана, усе ў масках, трымаюць адлегласць», - кажа жыхарка Гомеля.

«Нічога не адбываецца! У нас усё добра!»

Ад жыхароў іншага шматпавярховага дома ў спальным раёне Гомеля паступіла інфармацыя, што ў іх пад'ездзе ўчора праходзіла дэзінфекцыя. З адной з кватэр «хуткая» забрала з падазрэннем на каронавірус маладую дзяўчыну, якая лётала раней у Лондан.

У пад'езда карэспандэнты сустрэлі дарослую жанчыну. Яна зняпраўдзіла інфармацыю, што адтуль забіралі маладую дзяўчыну і што праходзіла санітарная апрацоўка.

«Гэта ўсё няпраўда. У нас усё добра», - злосна адказала жыхарка дома. Праз некалькі хвілін да пад'езда пад'ехала «хуткая», прычым яе супрацоўнікі былі апранутыя ў ахоўныя касцюмы.

Жанчыну і мужчыну сталага веку, якія выйшаў з пад'езду, забралі на гэтай «хуткай» і павезлі ў бок інфекцыйнага шпіталя.

Журналісты не здолелі атрымаць каментар ні ў прэс-службе Міністэрства аховы здароўя, ні ў Гомельскім аблвыканкаме.