Арцём Мілеўскі: У Віцебску цяжкая сітуацыя з каранавірусам
20- 14.04.2020, 19:05
- 25,744
Форвард берасцейскага «Дынама» заявіў, што футбалістам «страшнавата» гуляць у чэмпіянаце Беларусі.
Форвард берасцейскага «Дынама» Арцём Мілеўскі распавёў пра тое, што матч каманды ў рамках пятага тура з «Віцебскам» мог быць перанесены, паведамляе «Трибуна».
«У нас матч у Віцебску, а там цяжкая сітуацыя з каранавірусам. Нібыта павінны былі перанесці, але ў выніку не перанеслі. Страшнавата», - сказаў Мілеўскі падчас жывога эфіру з Аляксандрам Аліевым у інстаграме.
Нагадаем, матч «Віцебска» ўжо быў раней перанесены з гэтага горада. Гульня са «Смалявічамі» прайшла ў Барысаве на стадыёне «Гарадскі». АБФФ паведаміла пра тое, што задаволена хадайніцтва клуба пра перанос сустрэчы ў сувязі з дрэннымі ўмовамі надвор'я, нізкай сярэднясутачнай тэмпературай і дрэнным станам поля. Бакі адхілілі інфармацыю пра тое, што матч мог быць перанесены праз складаную эпідэміялагічную сітуацыю ў Віцебску.
Пазней міністр аховы здароўя Беларусі Уладзімір Каранік пацвердзіў, што гульня была перанесеная менавіта праз каранавірус. Кіраўнік АБФФ Уладзімір Базанаў у адказ на гэта заявіў, што «Гэта наогул не Караніка справа - агучваць такія моманты».
Матч «Віцебск» - «Дынама» Берасце запланаваны на 18 красавіка (субота).