Кіраўніца фонду «Дзеці Чарнобыля» заявіла пра ўспышку каранавіруса ў доме-інтэрнаце пад Глускам

Тэст апынуўся станоўчым у 13 дзяцей і 10 супрацоўнікаў.

- Гэта зруйнавальны ўдар для нас і для ўсіх ірландцаў, якія былі ўцягнутыя ў развіццё дзіцячага дома на працягу апошніх 20 гадоў. Мы вельмі занепакоеныя тым, што можам страціць дзяцей, чые жыцці мы адчайна спрабавалі палепшыць шмат гадоў, - такое эмацыйнае паведамленне з'явілася на сайце ірландскай дабрачыннай арганізацыі «Дзеці Чарнобыля», піша kp.by. - Мы спадзяваліся на тое, што прынятыя захады дапамогуць абараніць дзяцей ад гэтай жудаснай пандэміі, але нашы горшыя меркаванні сталі рэальнасцю: у 13 дзяцей і 10 супрацоўнікаў станоўчыя вынікі тэсту на каранавірус.

Веснаўскі дом-інтэрнат знаходзіцца недалёка ад Глускага, райцэнтра Магілёўскай вобласці. Там жывуць 174 выхаванцы ва ўзросце ад 4 да 33 гадоў з асаблівасцямі псіха-фізічнага развіцця.

У інтэрв'ю ірландскаму каналу RTE пра ўспышку каранавіруса ў гэтым доме-інтэрнаце распавяла старшыня арганізацыі «Дзеці Чарнобыля» Эдзі Роўч. Яна адзначыла, што шанцы на выжыванне дзяцей вельмі нізкія - у іх моцна аслаблены імунітэт. У інтэрнаце яны жывуць у цесных умовах, таму захоўваць дыстанцыю будзе вельмі складана. Фонд звярнуўся да беларускіх уладаў, каб цяжкахворых дзяцей ізалявалі, перамясцілі іх у гатэлі ці іншыя даступныя цэнтры ў рэгіёне.

Эдзі Роўч кажа, што цяпер сітуацыя ў Веснаўскім доме-інтэрнаце крытычная: там мала або зусім няма лекаў, не стае сродкаў індывідуальнай абароны і фінансаў, каб абараніць дзяцей і персанал. З яе слоў, дырэктар дзіцячага дома звярнуўся ў фонд з просьбай накіраваць абязбольваючыя, лекі ад кашлю і сродкі дэзынфекцыі.

Журналісты звярнуліся па каментары да дырэктара Веснаўскага дома-інтэрната Вячаслава Клімовіча - ён ад размовы адмовіўся.

- Вы зразумейце, я заўсёды адкрыты да дыялогу, але я сёння не магу гаварыць. Уся сітуацыя скажаецца.

Намеснік старшыні Глускага райвыканкама Дзмітрый Цімчанка заявіў, што ён не ўпаўнаважаны каментаваць гэтую сітуацыю, і параіў звярнуцца ў Міністэрства аховы здароўя.

Апошнія 20 гадоў дзеці з гэтага інтэрната ездзілі ў Ірландыю на летнія і калядныя вакацыі. Эдзі Роўч распавяла, што сям'і, якія прымаюць, ужо ў курсе ўспышкі каранавіруса ў інтэрнаце.

- Гэта жахліва трывожны час для гэтых сем'яў: дзеці, якіх яны кожны год бралі з дзіцячага дома, сталі часткай іх уласных сем'яў, таму навіна стала для іх моцным ударам.

Паводле неафіцыйнай інфармацыі, каранавірус пацверджаны і ў некаторых выхаванцаў Чэрвеньскага дома-інтэрната для дзяцей-інвалідаў. Яго дырэктарка Эла Барысава не стала гэта ні пацвярджаць, ні зняпраўджваць.

- Наш дом-інтэрнат працуе ў штатным рэжыме, выконваюцца ўсе меры, каб не дапусціць распаўсюджвання каранавіруснай інфекцыі.

- То бок, у вас няма інфіцыраваных?

- Я гэтага не казала. Вы ж не можаце сказаць, што не захварэеце, калі будзеце насіць маску. Мы выконваем усе меры засцярогі. Астатнія пытанні можаце задаць міністру - толькі ён упаўнаважаны даваць каментары.