«Нямецкая хваля»: Пратэсты ў Берасці супраць акумулятарнага завода не сціхаюць

Нядзельнаму «кармленню галубоў» ужо больш за два гады.

На традыцыйнае нядзельнае пратэставае "кармленне галубоў" 17 траўня прыйшлі блізу сотні жыхароў Берасця. Гэтай традыцыі ўжо больш за два гады – з таго часу, як упершыню з'явілася інфармацыя пра намер кампаніі "АйПаўэр" пабудаваць у свабоднай эканамічнай зоне "Берасце" завод акумулятарных батарэй, піша "Нямецкая хваля".

Жыхары горада і размешчаных паблізу вёсак перакананыя, што з'яўленне падобнага прадпрыемства будзе пагражаць іх здароўю.

Суды і штрафы за выхады на плошчу

Цягам тыдня ў Берасці праходзілі суды над спаборнікамі акумулятарнага завода і праваабаронцамі, якія вядуць маніторынг акцый пратэсту мясцовых жыхароў. У выніку шасцярых актывістаў і двух праваабаронцаў (Уладзіміра Вялічкіна і Рамана Кісляка) суд аштрафаваў за ўдзел у несанкцыянаваных масавых мерапрыемствах на 8100 беларускіх рублёў (больш за 3000 еўраў). Некаторыя суды перанесеныя на наступны тыдзень.

Яшчэ адзін удзельнік нядзельнай акцыі Уладзімір паведаміў, што некаторыя актывісты прынялі пастанову перайсці на рэжым самаізаляцыі, паколькі не ўважаюць спрыяльнай эпідэміялагічную сітуацыю ў ізалятарах часовага ўтрымання, дзе ім даводзілася знаходзіцца ў чаканні судоў. Акрамя таго, за лідарамі пратэсту прадаўжаецца сачэнне з боку праваахоўных органаў. Паводле словаў Уладзіміра, у такой сітуацыі ягоныя паплечнікі пастанавілі застацца дома, каб унікнуць прэвентыўнага затрымання.

Да уладаў даверу няма

Самі актывісты заяўляюць, што падставай для прадаўжэння акцый паслужыла пастанова дзяржаўнай экалагічнай экспертызы выдаць у красавіку 2020 года дадатную выснову кампаніі "АйПаўэр". На іх думку, гэта можа сведчыць пра намер уладаў у самы блізкі час запусціць завод у эксплуатацыю.

Між тым летам 2019 года старшыня Берасцейскага аблвыканкама Анатоль Ліс выдаў распараджэнне пра прыпыненне будаўніцтва акумулятарнага завода "да ліквідацыі выяўленых парушэнняў". У красавіку 2020 года ён жа не выключыў, што завод можа быць перапрафіляваны, калі не будуць выкананыя ўсе патрабаванні экалагічнага заканадаўства.

"Беручы да ўвагі, якія рэпрэсіі цяпер пачаліся, людзі не вераць такім заявам уладаў і гатовыя змагацца да канца", – мяркуе ўдзельніца пратэсту Наталля. Пра катэгарычнасць намераў сведчыць і той факт, што на адной з краўндфандынгавых платформаў стартаваў збор сродкаў на падтрымку актывістаў, якія атрымалі вялікія штрафы.

Лёс завода

Пратэст праціўнікаў акумулятарнага завода доўжыцца ў рэгіёне з сакавіка 2018 года. З тых часоў кожную нядзелю неабыякавыя жыхары выходзяць на плошчу Леніна ў Берасці з нагоды "пакарміць галубоў" і тым самым выказаць сваю маўклівую нязгоду са з'яўленнем экалагічна небяспечнага прадпрыемства.

Запуск акумулятарнага завода каля Берасця першапачаткова планаваўся ў жніўні 2018 года, аднак потым некалькі разоў пераносіўся. Пры гэтым заснавальніца прадпрыемства – кампанія "АйПаўэр" – за гэты час змяніла генеральнага праектавальніка і перарабіла праект самога завода.

Акрамя таго, кампанія саступіла ў судзе Берасцейскаму аблвыканкаму і павінна вярнуць у інавацыйны фонд больш за 5,7 мільёна рублёў (больш за 2,1 мільёна еўраў), паколькі не выканала ў тэрмін умовы выдаткавання гэтых сродкаў.

Пры гэтым на онлайн-прэс-канферэнцыі дырэктар ТАА "АйПаўэр" Дзмітрый Бутаў паведаміў, што акумулятарны завод плануюць увесці ў эксплуатацыю ўжо ў другім квартале 2020 года.