Археолагі знайшлі ўнікальныя артэфакты ў месцы нараджэння індыйскага бога Рамы

Гэта месца ўважаюць для сябе святым і індуісты, і мусульмане.

У Індыі археолагі з дазволу правінцыйных уладаў і суда правялі раскопкі на месцы старажытнага храма Раджанмабхумі ў горадзе Аёдх'і, які ўважаецца за родны для індуісцкага бога Рамы, і выявілі шэраг каштоўных старажытных артэфактаў, а таксама рэшткі святыні.

Як паведамляе The New Indian Express, артэфакты пачалі знаходзіць яшчэ на стадыі прыборкі смецця і падрыхтоўкі пляцоўкі да будаўніцтва новага рэлігійнага комплексу. У гэтым няма нічога дзіўнага. Справа ў тым, што працы праводзіліся ў месцы, якое святым для сябе ўважаюць і індуісты, і мусульмане.

Напрыклад, індуісты вераць, што ў старажытным горадзе Аёдх'і нарадзіўся Рама - адзін з самых важных індуісцкіх багоў. За 2000 тысячы гадоў тут было ўзведзена і зруйнавана нямала храмаў, а ў апошнія гады вакол мясцовых свяцілішчаў вяліся судовыя спрэчкі.

Што тычыцца знаходак, то яны вельмі каштоўныяі з навуковага пункту гледжання. Напрыклад, быў знойдзены каменны артэфакт, вядомы як Шыва-Лінга - гэта сімвал чароўнай сілы, адно з абстрактных пазначэнняў бога Шывы.

Акрамя таго, было знойдзена сем калон, вырабленых з чорнага каменя, шэсць слупоў з чырвонага пясчаніку, а таксама некалькі зламаных ідалаў і статуй, якія паказваюць розных індуісцкіх багоў.

Археолагі мяркуюць, што сем чорных калон былі часткай храма, узрост якога можа налічваць за 2000 гадоў. Раней навукоўцы знаходзілі такія структуры пэўнага ўзросту пры раскопках іншых храмаў.

Калі лабараторны аналіз калон пацвердзіць папярэдняе датаванне, то гэта можа азначаць, што гэтую святыню пабудаваў Вікраамадзіцья - легендарны індуісцкі імператар, які многімі індыйцамі шануецца як ідэальны кіраўнік.

У сваю чаргу, гэта пралье новае святло на гісторыю самога горада Аёдх'і. Дарэчы, індыйская прэса паведамляе, што мясцовыя ўлады, магчыма, схавалі ад грамадскасці частку археалагічных знаходак датуль, пакуль іх не абследуюць экспэрты. Ужо занадта шмат спрэчак прынесла гэтае месца.

Так, у 1992 годзе была зруйнаваная мячэць, якая стаяла тут. Паводле легенды, яна была пабудаваная заснавальнікам імперыі Маголаў яшчэ ў XVI стагоддзі. Індуісты мяркуюць, што да мячэці тут стаяў храм, прысвечаны богу Раме. Магчыма, што археалагічныя раскопкі дазволяць паставіць кропку ў зацяжной рэлігійнай спрэчцы.