У Фінляндыі сабак навучаюць «вынюхваць» хворых з каранавірусам
4- 28.05.2020, 14:14
- 12,838
Тэставанне можа быць выкарыстана ў медыцынскай практыцы.
Ва ўніверсітэце Хельсінкі ў ходзе пілотнага даследавання сабак навучаюць распазнаваць раней невядомыя прыкметы паху захворвання на COVID-19, выкліканага новым каранавірусам, паведамляе Deutsche Welle.
Усяго праз некалькі тыдняў даследавання першыя сабакі змаглі дакладна адрозніць узоры мачы пацыентаў з COVID-19 ад узораў мачы здаровых людзей.
"У нас ёсць салідны досвед у навучанні сабак выяўляць пахі, звязаныя з хваробамі. Было фантастычна бачыць, як хутка сабакі адчуваюць новы пах", – кажа кіраўнік групы DogRisk Ганна Хільмі-Б’ёркман.
Адзначаецца, што праз кароткі час жывёлы змаглі ідэнтыфікаваць мачу людзей, заражаных SARS-CoV-2, амаль гэтак сама надзейна, як і стандартны тэст ПЦР.
Фінскія навукоўцы цяпер рыхтуюць рандамізаванае падвойнае сляпое даследаванне, падчас якога сабакі будуць аналізаваць большую колькасць узораў пацыентаў. Толькі пасля гэтага "тэставанне на пах" зможа быць выкарыстанае ў клінічнай практыцы.
Іншыя групы даследнікаў, напрыклад у Вялікай Брытаніі і Францыі, таксама навучаюць сабак выяўляць COVID-19. Адкрыццё фінскіх навукоўцаў можа быць каштоўным для іх.
Да гэтага часу не зразумела, якія рэчывы ў мачы выклікаюць характэрны пах COVID-19. Паколькі SARS-CoV-2 не толькі атакуе лёгкія, але і выклікае пашкоджанні крывяносных сасудаў, нырак і іншых органаў, мяркуецца, што пах мачы пацыентаў таксама мяняецца. Гэта тое, што адразу заўважаюць сабакі з іх высокачуллівым нюхам.