Кыргызстан мае намер прымусова вярнуць з Беларусі ў краіну збеглага экс-прэзідэнта Бакіева

Бакіеў, ягоныя сваякі і сябры «блізкага кола» збеглі з краіны пасля «Красавіцкай рэвалюцыі».

Генеральная пракуратура Кыргызстана вядзе працу для прымусовага вяртання ў краіну былога прэзідэнта рэспублікі Курманбека Бакіева, завочна прысуджанага да 30 гадоў пазбаўлення волі паводле абвінавачвання ў суўдзеле ў масавым забойстве, паведамляе прэс-служба кіргізскай нагляднай структуры ў панядзелак, паведамляе interfax.by.

«Цяпер ідзе праца ў рэалізацыі прымусовых захадаў для вяртання ў краіну Курманбека Бакіева, ягоных братоў Жаныбека (Жаныш), Адзільбека, Марата, Каныбека, а таксама ягонага сына Максіма», - гаворыцца ў паведамленні.

Ва ўстанове заявілі, што ў дачыненні да Курманбека Бакіева, ягоных сваякоў і набліжаных да яго асоб судамі завочна вынесеныя абвінаваўчыя прысуды аб фактах учынення цяжкіх і асабліва цяжкіх злачынстваў.

Былы прэзідэнт Кыргызстана Курманбек Бакіеў, ягоныя сваякі і сябры «блізкага кола» збеглі з краіны пасля «Красавіцкай рэвалюцыі». 7 красавіка 2010 года ў цэнтры Бішкека адбыліся сутыкненні паміж уладай і апазіцыяй, падчас якіх больш за 80 чалавек былі забітыя, больш за 300 пацярпелі. У выніку гэтых падзей у Кыргызстане змянілася ўлада.

Курманбек Бакіеў завочна прызнаны вінаватым у суўдзеле ў арганізацыі масавага забойства. У 2016 годзе суд у Кіргізіі змяніў яму ранейшы прысуд да пажыццёвага зняволення на 30-гадовы турэмны тэрмін. Ягоны брат Жаныш Бакіеў асуджаны да пажыццёвага зняволення.

Кыргызстан дамагаецца ад Беларусі выдачы Бакіева цягам апошніх гадоў, беларускі бок неаднаразова адмаўляў у іх выдачы пад падставай пагрозы палітычнага пераследу на радзіме.

Паводле неафіцыйных звестак, у Беларусі таксама знаходзіцца старэйшы сын экс-прэзідэнта Кыргызстана Марат Бакіеў, які да красавіка 2010 года займаў высокую пасаду ў кіргізскай спецслужбе. Ён быў асуджаны за ўдзел у падаўленні дэманстрацыі 7 красавіка 2010 года. Суд завочна прысудзіў яго да 22 гадоў пазбаўлення волі.

Другі сын Курманбека Бакіева Максім завочна прысуджаны ў Кыргызстане да пажыццёвага тэрміну пазбаўлення волі паводле абвінавачванняў у карупцыі і адмыванні нелегальных даходаў і абвешчаны ў міжнародны вышук. Паводле інфармацыі СМІ, цяпер пражывае ў Лондане.