Мілеўскі расказаў пра ўспышку каранавіруса ў берасцейскім «Дынама»

Колькасць заражаных каранавірусам у камандзе дасягнула 16 чалавек.

Форвард берасцейскага «Дынама» Арцём Мілеўскі распавёў пра ўспышку каранавіруса ў камандзе, піша «Трыбуна».

«Мае апошнія дні на самаізаляцыі. Яшчэ трошкі, і будзе і поле, і мяч. Другія выходныя запар мы не гуляем, нам пераносяць матчы ў чэмпіянаце Беларусі.

Усё гэта звязана з гэтай каронай, хай яе ліха. Я сяджу дома ўжо 12-ы дзень. З дому мне можна выходзіць на вуліцу раніцай на 15 хвілін і ўвечары на 15 хвілін у краму.

Страшна з гэтай штукай, калі ў цябе быццам як дадатны тэст, але няма ніякіх сімптомаў: ні кашлю, ні пнеўманіі, ні тэмпературы. Ні разу за гэтыя 12 дзён не было. Адзінае, калі гэта ўсё толькі пачыналася, то прапаў нюх.

У нас смех быў з хлопцамі ў раздзявальні: пырскалі дэзадарантамі і нюхалі. Але гэта спачатку мы жартавалі, але ў выніку перанеслі два туры, а ў многіх дадатныя вынікі. Але ва ўсіх гэта ўсё праходзіць спакойна і незаўважна.

Ну ёсць выпадкі і горай: людзі з тэмпературай, з пнеўманіяй. Усё гэта дрэнна», - сказаў Мілеўскі ў эфіры ютуб-канала «Міля».

Раней паведамлялася, што агульная колькасць заражаных каранавірусам у берасцейскім «Дынама» дасягнула 16 чалавек.

Футбалістаў у гэтым спісе 11 чалавек: Лапцеў, Хачарыдзі, Садоўскі, Мілеўскі, Вітус, Пячэнін, Крывец, Гардзяйчук, Юзэпчук, Наёк і Ігнатовіч. Трое апошніх знаходзіліся ў лякарні. Яшчэ пяць заражаных - з ліку абслуговага персаналу. Наёк закончыў сваё знаходжанне на карантыне.

Берасцейскае «Дынама» прапусціла мінулы і гэты тур вышэйшай лігі чэмпіянату Беларусі.