Развітанне з Мікітам Крыўцовым у Маладзечне

Ён не баяўся выказаць свае погляды.

25 жніўня ў Маладзечне пройдзе развітанне з Мікітам Крыўцовым, які быў знойдзены павешаным у Менску. Хоць ён знік падчас разгонаў пратэстаў, у Следчым камітэце намагаюць, што ягоная смерць не мае крымінальнага характару, але сваякі ў гэта не вераць, паведамляе «Белсат».

Мікіта Крыўцоў нарадзіўся ў Вілейцы, жыў у Маладзечна, заўзеў за мясцовую футбольную каманду. Пасля вяселля ён жыў у Жодзіне разам з жонкай Аленай і маленькай дачкой. Мікіта Крыўцоў знік 12 жніўня. Са слоў сваякоў, раніцай гэтага дня ён паехаў на працу ў пасёлак Каралёў Стан пад Менскам. Цела Мікіты Крыўцова знайшлі 22 жніўня ў лесапаласе ў межах Менска. З паведамлення СК, ён засіліўся, слядоў крымінальнага характару на целе не было.

Паводле інфармацыі з сацыяльных сетак, а таксама ад чытачоў «Белсата», апошні раз нумар тэлефона Крыўцова быў зафіксаваны ў РНПЦ неўралогіі і нейрахірургіі ў Менску, што недалёка ад таго месца, дзе сёння знайшлі цела Мікіты Крыўцова. Побач з РНПЦ неўралогіі таксама знаходзіцца будынак міліцыі.

23 жніўня знайшлося відэа, на якім Мікіта Крыўца 9 жніўня стаіць перад АМАПам з бел-чырвона-белым сцягам на плошчы ў Маладзечне.

Родныя Мікіты Крыўцова ў нядзелю звярнуліся ў Следчы камітэт з заявай «аб прыцягненні нявысветленых асоб да крымінальнай адказнасці, якія выкарысталі гвалт».

Пры гэтым СК адмовіўся ад працэдуры апазнання.

«Нам цела проста выкідаюць у пакеце без апазнання. Нікога не пускаюць, проста кажуць: «вывозьце і глядзіце ў полі або на ганку. Без следчага мы апазнання рабіць не будзем». А следчы адмаўляецца туды ехаць. І што нам рабіць? Ката ў мяшку забіраць? Напісалі паперу, што гэта суіцыд, і ўсё - да пабачэння... Напэўна, баяцца таго, што яны самі нарабілі», - распавяла маці хлопца Анжаліка Кахно.

Афіцыйны прадстаўнік СК Сяргей Кабаковіч у адказ адзначыў, што праводзіць апазнанне няма патрэбы, «бо мы і так ведаем, хто гэты чалавек (дзякуючы пэўным рэчам)». Зараз Следчы камітэт праводзіць праверку аб факце выяўлення цела Мікіты Крыўцова. Як правіла, яна доўжыцца 10 дзён, але потым гэты тэрмін можа падаўжацца. Па выніках Следчы камітэт можа альбо пачаць крымінальную справу, альбо адмовіць у яе распачынанні.

«Ён любіў жыццё»

23 жніўня жонка памерлага Алена Крыўцова падала ў Следчы камітэт заяву на распачынанне крымінальнай справы паводле факту смерці мужа, бо не выключае яго выкраданне і забойства. Следства ж схіляецца да версіі самагубства пад падставай жадання Крыўцова развесціся.

«Ён быў вельмі жывым, любіў жыццё і па-чалавечы не быў такім моцным, каб сябе забіць. У яго былі вялікія планы на далейшае жыццё, не збіраўся яго заканчваць. Гэта зусім на яго не падобна, што ён засіліўся. Гэта не ён так зрабіў», - мяркуе Алена Крыўцова.

Алена Крыўцова не верыць у версію, што прычынай самагубства мужа магла быць іх пастанова скасаваць шлюб.

«Гады два ў нас ужо праблемы ў шлюбе, мы сапраўды абмяркоўвалі будучы развод, але гэта не было для яго стрэсам, мы спакойна пра гэта размаўлялі. Мы думалі, што дзесьці пасля верасня пададзім заяву, але канкрэтнай даты не прызначалі. Мікіта працаваў, працягваў захапляцца футболам - жыў паўнавартасным жыццём. Пра такі канец ён дакладна не думаў і мне не казаў», - расказала Алена.

Паводле ейных слоў, яе муж быў «актыўны, баявы», не баяўся «паказаць свае погляды».

Са слоў аднаго з сяброў Крыўцова з Маладзечна, які прасіў яго не называць, калі раніцай 12 жніўня Мікіта збіраўся на працу, дык узяў з сабой рэчы, якія могуць спатрэбіцца на працягу некалькіх дзён.

«Калі ён знік, мы адразу не турбаваліся, бо не выключалі, што ён схаваўся. Інакш навошта браў тыя рэчы? Гэта значыць ён сапраўды падазраваў, што яго могуць затрымаць», - мяркуе сябар.

Развітанне з Мікітам Крыўцова адбудзецца сёння з 12.30 да 14.00 у рытуальнай зале на вуліцы Янкі Купалы, 50 у Маладзечне.

Мікіта Крыўцоў стаў шостым актывістам, якія загінулі ў Беларусі з пачатку пратэстаў супраць вынікаў прэзідэнцкіх выбараў.

10 жніўня ў Менску загінуў 34-гадовы Аляксандр Тарайкоўскі, які, згодна з відэакрыніцамі, быў застрэлены на месцы. Афіцыйна ў МУС заяўлялі, што ў яго руках выбухнуў невядомы прадмет.

У Гомелі 11 жніўня памёр 25-гадовы Аляксандр Віхор, якога затрымалі 9 жніўня. Афіцыйна прычыны смерці ўсё яшчэ высвятляецца.

16 жніўня загінуў 19-гадовы Арцём Парукаў, афіцыйна яго збіла машына на Партызанскім праспекце.

19 жніўня ў вайсковым шпіталі Менска памёр 43-гадовы Генадзь Шутаў. Яго паранілі ў галаву 11 жніўня ў раёне Маскоўскай адміністрацыі Берасця падчас пратэстаў.

У Ваўкавыску знайшлі цела 29-гадовага Канстанціна Шышмакава, які будучы чальцом участковай камісіі адмовіўся падпісваць выніковы пратакол. З ім развіталіся 20 жніўня, родныя адмовіліся каментаваць смерць журналістам. Прычыны смерці пакуль невядомыя.