У Расеі меркаваны атрутнік Літвіненкі будзе «расследаваць» атручэнне Навальнага
9- 1.09.2020, 20:45
- 33,755
Андрэй Лугавы ўжо назваў атручэнне расейскага апазіцыянера «спецыяльнай аперацыяй».
Дэпутат Дзярждумы РФ ад ЛДПР Андрэй Лугавы з'яўляецца сябрам камісіі Дзярждумы ў бяспецы і супрацьдзеянні карупцыі, якая зоймецца вывучэннем атручвання апазіцыйнага палітыка Аляксея Навальнага. Пра гэта паведаміў тэлеканал «Дождь», апублікаваўшы інтэрв'ю з дэпутатам.
«Было выказана меркаванне старшынёй Думы Вячаславам Віктаравічам Валодзіным пра тое, каб камітэт звярнуў увагу на падзеі, якія адбываюцца ў апошні час вакол Навальнага, і, я думаю, ён цалкам справядліва гэта зрабіў, таму што тое, як развіваюцца падзеі, як працуе прапаганда на Захадзе і, я б сказаў, апазіцыйная прапаганда ў Расеі, кажа пра тое, што, безумоўна, усё, што адбываецца з Навальным, не з'яўляецца выпадковасцю», - заявіў Лугавы, адказваючы на пытанне, чаму менавіта гэты камітэт будзе займацца расследаваннем.
У ходзе размовы ён таксама назваў Шарытэ «сумнеўнай клінікай», якая «пастаянна прымае атручаных апазіцыянераў з усяго свету».
«Навальны - палітычны дзеяч, безумоўна, у Расеі вядомы, які карыстаецца папулярнасцю ў пэўнай групы насельніцтва. Яго перадачы, яго выступы, безумоўна, прыцягваюць увагу. Многае, што ён кажа, безумоўна, хлусня і хлусня беспардонная, прычым праплачаная. Шмат што з таго , што ён кажа, сапраўды заслугоўвае ўвагі. І, безумоўна, калі цяпер разглядаць, каму была выгадная сітуацыя з Навальным, то ні ў каго няма сумневаў, што выгадная яна перш за ўсё для таго, каб пачаць чарговую істэрыю супраць Расеі. Як у любой іншай справе, якая была са Скрыпалямі, з Літвіненкам, усё сканчаецца звычайнай расейскай прыказкай: «Ці то ў яго футра скралі, ці то ён скраў», - пракаментаваў дэпутат сітуацыю з атручваннем Навальнага.
Ён таксама заявіў, «што ўсё, што адбываецца з Навальным, - выдатна падрыхтаваная, глыбока заканспіраваная спецаперацыя, не выключана спецслужбаў Вялікабрытаніі і ЗША».
«Я думаю, усё тое, што адбывалася вакол Навальнага з яго адлётам, палётам і ўсім астатнім, кажа, што гэта наогул да атручвання не мае ніякага дачынення», - сказаў Лугавы, дадаўшы, што «лекары ў Омску мяркуюць, што гэта праблема з парушэннем абмену рэчываў».
Дэпутат дадаў, што «яны (нямецкія лекары) наўрад ці штосьці могуць тлумачальнае выявіць, калі нават мела месца атручэнне».
У ходзе інтэрв'ю дэпутату нагадалі, што расейскія органы дагэтуль не распачалі крымінальную справу.
«Слухайце, калі камусьці становіцца дрэнна і ў кагосьці, прабачце, атручэнне харчовае ці нешта, адразу казаць пра адмысловае атручванне нейкае? Трэба разабрацца. Для таго каб была распачатая крымінальная справа, у лекараў павінны быць для гэтага сур'ёзныя падставы. У лекараў у Омску такіх падстаў няма, і я думаю, што ніякага атручвання не было адназначна», - адказаў на гэта Лугавы, паказаўшы, што падстаў для правядзення расследавання няма.
Нагадаем, у кастрычніку 2006 года Андрэй Лугавы і прадпрымальнік Дзмітрый Коўтун сустрэліся ў Лондане са сваім дзелавым партнёрам Аляксандрам Літвіненкам - пасля таго 23 лістапада Літвіненка памёр ад атручвання.
Следства высветліла, што Літвіненка быў атручаны 1 лістапада палоніем-210 у бары гатэля «Міленіум» - пасля сустрэчы з Лугавым і Коўтунам.
Сам Лугавы абвінавачванні адмаўляе, заяўляючы, што да справы могуць быць датычныя брытанскія спэцслужбы, якія завербавалі Беразоўскага і Літвіненку і спрабавалі завербаваць самога Лугавога, каб прымусіць збіраць кампрамат на Уладзіміра Пуціна.
Генеральная пракуратура Расеі не задаволіла запыт МУС Вялікабрытаніі аб экстрадыцыі Лугавога - яна спаслалася на 61-ы артыкул Канстытуцыі Расеі і абвінаваціла Скотланд-Ярд у недахопе доказаў, неаб'ектыўнасці і палітычнай ангажаванасці крымінальнага расследавання.