Жыхары Жабінкі - міліцыі: У вас сёння вельмі хісткае становішча

Падчас штодзённай акцыі пратэсту ў райцэнтры адбылася шчырая размова.

Да людзей, якія кожны вечар збіраюцца на гарадской плошчы ў Жабінцы, прыйшоў начальнік аддзела аховы правапарадку і прафілактыкі Жабінкаўскага РАУС Дзмітрый Салей - з патрабаваннем зняць БЧБ-сцяг, які ў гэты час вісеў на парэнчах ДК. Запіс размовы міліцыі і народа апублікаваў «Вечерний Брест».

Галасы з натоўпу:

- Калі ў нас скралі выбары, што нам застаецца рабіць? Чакаць, пакуль нам дадуць дазвол на мітынг, чакаць месяц, два...

- Міліцыя вам не пакажа гэтыя пратаколы, як вы не разумееце, - казаў Дзмітрый Салей.

- А вы выступаеце як карны орган, у плане затрыманняў. Хлопцы, у вас сёння вельмі хісткае становішча, так што думайце, што вы робіце і для каго вы гэта робіце.

- Мяне аштрафавалі на 20 базавых адзінак - а за што? Я стаяў з усімі людзьмі, са сцягам. Шкода камусьці прычыніў або шкоду чамусьці?

- А хто адкажа за тое, што білі вось тут людзей, на плошчы? Што ў Менску, Гародні і іншых гарадах людзей б'юць?

- У кожнага чалавека ёсць выбар, за пэўнай рысай ёсць выбар!

- Не, няма выбару.

- На сённяшні дзень вы не ў лепшым становішчы ў дачыненні да грамадзян, якія жывуць у гэтай краіне, разумееце? Вы асабіста нічога дрэннага нікому не робіце, але вы ў сістэме, якая шмат кім праклятая на сённяшні дзень.

- А калі вам скажуць заўтра нас пабіць, дадуць у рукі зброю або дубінку? Што вы будзеце рабіць?

- Я не буду адказваць на такія пытанні.

- 9-10 жніўня вы тут стаялі, АМАП выклікалі, гэта ганьба нейкая.

- Вы хочаце, каб я адказнасць ўзяў?

- Чаму вы тады ходзіце сюды, калі ні на адно пытанне не можаце адказаць? Вы за свае дзеянні не адказваеце, вы нас адсылаеце ва УУС. Прабачце, я вам задаю пытанне. Вы - грамадзянін Рэспублікі Беларусь. Вы атрымліваеце заробак з нашых падаткаў і павінны нас абараняць, бараніць нашы правы. Вы бароніце хлусню.

- Якую хлусню?

- Элементарную. Пратаколы, якія вы выдаяце з датамі няправільнымі, з імёнамі па бацьку. Гэта называецца нядбалае стаўленне да працы, фальсіфікацыя дакумента, і вы не ведаеце пра гэта?

- Ведаю.

- Цяпер ужо ведаеце. Ведаеце, што ёсць артыкулы пэўныя, пад якія вы трапляеце. І вы ходзіце пад гэтымі артыкуламі. Думайце.

- Сапраўды, чалавеку 20 базавых адзінак далі - за што?! А тыя, хто біў 9-10 жніўня?

- А пры чым тут я, скажыце?

- Супрацоўнікі праваахоўных органаў 9-га, 10-га, 11-га чысла працавалі ў масках. Калі б іх можна было ідэнтыфікаваць, мы б выставілі патрабаванні да тых, хто біў, але паколькі яны ўсе былі ў масках, пад падазрэнне трапляе кожны з вас.

- Вы працуеце ў гэтай сістэме, вы яе прадстаўляеце, вы зрабілі свой выбар. Вы бачыце, што ўсё перайшло рысу, што гэта бязмежжа і беззаконне ў дачыненні да беларусаў, якія вайну прайшлі, ад Чарнобыля пацярпелі. І вы, застаючыся ў гэтай сістэме, зрабілі свой выбар.

- Я ў сістэме, я зрабіў свой выбар.

- Мы стаялі 9 жніўня ля райвыканкама, проста чакалі вынікаў. Я пайшла з дзіцем, я не ведала, што так небяспечна.

- АМАП прыгналі ў дзве гадзіны ночы, шчыты паставілі насупраць жанчын і дзяцей. Моладзь стаяла - ні аднаго «бычка» ніхто не кінуў. А наша міліцыя... Яны стаялі і смяяліся каля райвыканкама. Запэцкаліся.

- Мы вывесілі сцяг. Пакажыце закон, які забараняе нацыянальную сімволіку. Вы прадстаўляеце заканадаўчую ўладу, і мы вас чакаем, запрашаем прыехаць з законам.

- Так не будзе, як вы захочаце. Я прыеду, калі захачу.

- Можаце кожны дзень да нас прыходзіць... Мы разумеем, чалавек, які атрымлівае фізічныя калецтвы, становіцца больш згаворлівым. А вы фізічна будзеце ўдзельнічаць ў пакаранні?

- Я не буду адказваць на такія пытанні.

- Вы не хочаце адказваць за наступствы вашага адказу.

- Калі я перад кімсьці вінаваты або хтосьці вінаваты - яны за гэта адкажуць, разумееце? І я ў тым ліку.

- А вы разумееце, што ў адказе не толькі за сябе, а як часцінка гэтай сістэмы несяце адказ. Я як настаўнік нясу адказнасць за педагогаў, якія сядзелі, фальсіфікавалі і смяяліся пры гэтым. А вы несяце адказнасць за ўсё, што з намі ўчынілі. Вы пацвярджаеце, што выбары сфальсіфікаваныя?

- Я не магу гэтага ведаць. Мы адказваем за ахову грамадскага парадку.

- Вы ведаеце адказ на гэтае пытанне, таму вы тут і стаіце.