Новыя муралы: як менскія двары ператвараюцца ў галерэю пратэстнага мастацтва

Рэвалюцыя змяніла сталіцу.

Невядома, што прымушае сілавікоў ахоўваць кучу солі і сцяну, выпацканую бітумам, але відавочна, што справіцца з плынню пратэстнага арта ведамства проста не ў стане. Апошнім часам міліцыянты самі становяцца цэнтрам пратэстнага мастацтва і галоўным яго акторам. Кожны дзень у Менску становіцца яшчэ больш муралаў і скульптур, якія праслаўляюць падзеі і асоб апошніх пяці месяцаў. І нярэдка малюнкі на сцяне ператвараюцца ў яркі перформанс, за якім зачаравана сочаць дзясяткі тысяч менчукоў, піша onliner.by.

Мурал на плошчы Перамен

Нагадаем, у ліпені два дыджэі ўключылі песню Віктара Цоя «Перемен» на дні адчыненых дзвярэй устаноў дадатковай адукацыі і сарвалі авацыі, бо на мерапрыемстве стыхійна сабраліся прыхільнікі Святланы Ціханоўскай.

За сваю акцыю дыджэі атрымалі па 10 дзён адміністрацыйнага арышту, усенародную славу і месца на трансфарматарнай падстанцыі ў адным з менскіх двароў.

Напэўна, дзясяткі менчукоў зрабілі б сэлфі на фоне мурала і шчасна пра яго забыліся, калі б сілавікі не палічылі для сябе справай гонару ўсялякім коштам ад яго пазбавіцца. Гэта зрабіла з трансфарматарнай будкі лабараторыю сучаснага мастацтва, асноўнымі акторамі якой сталі не дыджэі і нават не жыхары, якія іх малююць, а сілавікі, якія аддзіраюць, зафарбоўваць малюнак і цэлымі днямі ахоўваюць знявечаную сцяну.

10 верасня сілавікі зафарбавалі сцяну бітумам, дачакаліся высыхання і адкалупалі сілуэты дыджэяў, якія за кошт настойлівасці жыхароў паспелі стаць барэльефам. Атрымаўся гарэльеф, які сілавікі зноў зафарбавалі бітумам. Наступны дзень некалькі міліцыянтаў правялі на фоне чорнай сцяны. Усё, што адбываецца нагадвала канцэпт-арт у Бэрлінскай галерэі. Вакол сабраліся дзясяткі людзей і журналістаў, каб на свае вочы ўбачыць гэты абсурд.

Міліцыянты паводзілі сябе ветліва і стараліся зліцца з ахоўным аб'ектам. Усё працягвалася аж да нядзельнага вечара, калі жыхары, прыпільнавалі момант і скарыстаўшыся адсутнасцю сілавікоў, зноў нанеслі стылізаваныя партрэты дыджэяў на чорны бітум. Уночы «людзі ў чорным» з дапамогай вострых прадметаў адкалупалі мурал ад трансфарматарнай будкі, але замест таго, каб сапсаваць, зрабілі яго яшчэ прыгажэйшым. Праўда, потым выправіліся, але АМАП-арт паспеў патрапіць на фота і відэа і беспаваротна закахаць у сябе менчукоў.

Дзіцячую пляцоўку з гэтай трансфарматарнай будкай, якая нехаця стала лабараторыяй пратэстнага арта, многія менчукі завуць плошчай Перамен. Нейкі час тут нават вісела адпаведная шыльда. Неўзабаве тапонім пазначылі на Google-картах. Да таго ж ва Уруччы і на Грушаўцы з'явіліся муралы-блізняты, якія дублююць графіці на Чарвякова.

Мурал у гонар Таварыства аховы на вадзе, МАЗа, МНС

Да выбараў МНС памнажала муралы ў свой гонар, каб праславіць службу ратавальнікаў і нагадаць грамадзянам аб правілах пажарнай бяспекі. Але апошнім часам ведамства занялося зусім няпрофільнай справай - дэмантажом БЧБ-сцягоў, нацягнутых паміж вышыннымі дамамі. Не ўсе супрацоўнікі МНС згаджаліся выконваць гэтую працу: вядома прынамсі пра два выпадкі, калі ратавальнікі не здымалі сцяг, а толькі распраўлялі яго ў паветры. Пасля гэтага на адной з трансфарматарных падстанцый ў Брылевічах з'явіўся чарговы малюнак, прысвечаны работнікам ведамства. Толькі ўжо народны.

У мінулую нядзелю народную любоў і адміністрацыйнае пакаранне займелі і супрацоўнікі Таварыства выратавання на вадзе. Калі пратэстоўцы скакалі ў Свіслач у спробе збегчы ад АМАПу, выратавальнікі выцягвалі іх з вады і перапраўлялі на іншы бераг. Пасля гэтага Таварыства таксама ўвекавечылі на адным з гарадскіх будынкаў.

На другой трансфарматарнай будцы з'явілася малюнак у гонар завадчан, якія ўдзельнічалі ў страйку і падтрымлівалі пратэст. Днямі малюнак змылі.

Партрэт Ніны Багінскай

Партрэт вядомай актывісткі Ніны Багінскай нядаўна з'явіўся ў Менску на сцяне школы міліцыі. З таго часу, як Багінская стала адным з сімвалаў жаночага пратэсту, мноства людзей прысвяціла ёй свае арты. Дабраліся яны да сцен Акадэміі МУС.

Змагарыч

Яшчэ адзін пратэстны арт-аб'ект з'явіўся ва Уруччы ў ноч на 12 верасня. Некалькі менчукоў пад покрывам цемры перафарбавалі мясцовую скульптуру ў чырвоны і белы колеры, каб праз мастацтва пазначыць сваю пазіцыю. Жыхары Уручча назвалі змея Змагарычам і зрабілі вакол яго свята з музыкай, шашлыкамі і сцягамі.

Уручанцы выказалі здагадку, што неўзабаве гарадскія ўлады перафарбуюць скульптуру ў іншы колер, аднак да гэтага часу са Змагарычам нічога не здарылася. Хоць каля яго ўжо былі заўважаныя збянтэжаныя сілавікі.

Яшчэ адзін БЧБ-мурал з'явіўся на парапеце жылога дома ва Уруччы. Здаецца, на ім намаляваная Нацыянальная бібліятэка ў характэрных пратэстных колерах.