Запазычанасць рэжыму Лукашэнкі за газ склала 328 млн даляраў

Улады Расеі спадзяюцца на яго выплату.

Прэм'ер-міністры Расеі і Беларусі Міхаіл Мішусцін і Раман Галоўчанка далі даручэнні прапрацаваць выплату запазычанасці па пастаўках энэрганосьбітаў Беларусі за гэты год. Пра гэта паведаміў журналістам у чацвер міністр энэргетыкі РФ Аляксандр Новак.

«Старшынямі ўрадаў дадзеныя даручэнні ў самыя кароткія тэрміны ўступіць у перамовы з улікам дасягнутых дамоўленасцей, пра якія сказаў Міхаіл Уладзіміравіч Мішусцін, пра выплату запазычанасці ў найбліжэйшы час, якая была назапашаная сёлета за пастаўкі газу. Такія даручэнні дадзеныя», - сказаў Новак паводле вынікаў перамоў прэм'ераў дзвюх краін (цытата паводле ТАСС).

Ён заявіў пра неабходнасць падтрымання стабільных і доўгатэрміновых стасункаў з Беларуссю ў пастаўках нафты і газу.

- Вядома, для нас вельмі важна, каб у нас былі стабільныя, доўгатэрміновыя дачыненні ў пастаўках нафты ў Рэспубліку Беларусь, у пастаўках газу. Сёння ўсе гэтыя пытанні абмяркоўваліся <...> у канструктыўным ключы, - паведаміў Новак.

Ён адзначыў, што Расея і Беларусь з'яўляюцца стратэгічнымі партнёрамі, РФ - асноўны пастаўшчык энэргарэсурсаў для рэспублікі. У той жа час Беларусь з'яўляецца буйным транзіцёрам: праз краіну транзітам у Еўропу праходзяць велізарныя аб'ёмы нафты і газу, нагадаў міністр.

Новак паведаміў, што «Белнафтахім» і расейскія нафтавыя кампаніі ўжо пачалі перамовы паводле ўмоў кантрактаў на 2021 год, яны праходзяць канструктыўна, кампаніі прапануюць пакінуць нязменнай формулу цэнаўтварэння, якая дзейнічае ў 2020 годзе.

Ён адзначыў, што цэны на нафту для Беларусі фармуюцца на аснове камерцыйных дамоўленасцей паміж расейскімі нафтавымі кампаніямі і «Белнафтахімам».

- Адпаведна, «Белнафтахім» і нашы нафтавыя кампаніі ўжо ўвайшлі ў перамовы паводле кантрактаў на 2021 год. Я ведаю, што паміж імі вельмі канструктыўныя перамовы, што нашы кампаніі пацвярджаюць ўзровень коштаў, якія дзейнічалі ў 2020 годзе, - паведаміў Новак.

Ён удакладніў, што ўзровень коштаў фармуецца, безумоўна, ад каньюнктуры рынкавых коштаў з улікам экспартнай мыты, якая не плаціцца. «Маецца на ўвазе, што формула цэнаўтварэння з улікам прэміяльных застаецца нязменнай», - растлумачыў міністр.

Што датычыцца аб'ёмаў паставак у Беларусь, то ён нагадаў, што нафта пастаўляецца ў краіну ў рамках індыкатыўных балансаў.

- На гэты год індыкатыўны баланс, на наступныя гады прадугледжвае 24 мільёны тон. Хоць аб'ём паставак трохі ніжэйшы з улікам патрэбнасці Рэспублікі Беларусь у перапрацоўцы, - дадаў Новак.

Гаворачы пра цэны на газ для Беларусі на наступны год, кіраўнік расейскага Мінэнерга падкрэсліў, што гэта таксама з'яўляецца прадметам перамоў, у першую чаргу на ўзроўні кампаній - пастаўшчыкоў газу - «Газпрама» і пакупнікоў газу, то бок спажыўцоў Беларусі.

- Я думаю, што гэтыя перамовы ў хуткім часе ўжо пачнуцца пасля выплаты запазычанасці за газ, - адзначыў ён.

На сярэдзіну жніўня запазычанасць беларускіх пакупнікоў перад «Газпрамам» перавысіла 300 млн даляраў. Аляксандр Новак паведаміў, што цяпер памер запазычанасці складае 328 млн даляраў.

- Ёсць з аднаго боку запазычанасць сумаю 328 млн даляраў, якая за пастаўкі газу існуе, у тым ліку ёсць перадаплата сумаю 101 млн даляраў. То бок вось гэтыя дзве лічбы, якія сёння ўлічваюцца ва ўзаемаразліках, - адзначыў міністр, але дадаў, што яшчэ неабходна правесці зверку.