Навукоўцы: Вядомыя лекавыя прэпараты дапамогуць пры COVID-19

Спецыялісты даказалі іх эфектыўнасць.

Танныя супрацьзапаленчыя стэроідныя сродкі могуць выратаваць жыццё пацыентаў з COVID-19, якія знаходзяцца ў крытычным стане, адзначае healthinfo.ua. Гэта 8 выратаваных жыццяў на кожныя 100 чалавек. Навукоўцы даказалі эфектыўнасць дэксаметазона і гідракартызона.

Назіранне за 1703 цяжкахворымі пацыентамі паказала: 40% памерлі пры стандартным лячэнні і 32% памерлі пры прыёме стэроідаў. Даследаванні праводзіліся толькі на самых цяжкіх пацыентах, агаворваюцца даследчыкі. Вядома: стэроідныя сродкі памяншаюць запаленне і могуць супакоіць імунную сістэму.

Яны ўжо выкарыстоўваюцца пры артрыце і астме, а таксама пры некаторых цяжкіх інфекцыях. Лічыцца, што лекі не дапамагаюць на ранніх стадыях каранавіруснай інфекцыі, калі сімптомы ўключаюць кашаль, жар, раптоўную страту смаку ці паху. Але па меры развіцця хваробы імунная сістэма можа выйсці з-пад кантролю, пашкодзіўшы лёгкія і іншыя органы. Менавіта на гэтай стадыі варта ўводзіць стэроідныя сродкі. Навукоўцы выкарысталі малыя дозы. Няма ніякіх доказаў таго, што вялікія дозы былі б больш эфектыўнымі.