МУС Украіны: Інфармацыя пра дачыненне да забойства Шарамета беларускіх спецслужбаў пацвярджае асноўную версію следства
15- 4.01.2021, 21:04
- 39,289
У МУС Украіны выказалі надзею, што новыя звесткі дапамогуць у пошуку заказчыкаў і арганізатараў забойства.
Інфармацыя аб магчымым дачыненні беларускіх спецслужбаў да забойства журналіста Паўла Шарамета наўрад ці паўплывае на разгляд у судзе справы ў дачыненні да фігурантаў Андрэя Антоненкі, Яны Дугар і Юліі Кузьменкі. Пра гэта ў каментары «BBC Україна» 4 студзеня сказаў дырэктар дэпартамента камунікацыі Міністэрства ўнутраных спраў Арцём Шаўчэнка.
«У абвінаваўчым акце выразна паказана, што іх дзеянні былі выкліканыя іншымі нявызначанымі асобамі. Непасрэдна на разгляд у судзе гэта наўрад ці паўплывае, таму што абвінавачаным інкрымінуецца менавіта ўдзел у выкананні гэтага злачынства», - сказаў ён.
Са слоў Шаўчэнкі, інфармацыя журналістаў «пацвярджае асноўную версію следства, што нашы абвінавачаныя дзейнічалі не самастойна, а выконвалі пэўную злачынную задуму пэўных неўстаноўленых асоб».
Ён выказаў надзею, што новыя звесткі дапамогуць у пошуку заказчыкаў і арганізатараў забойства.
4 студзеня 2021 года бельгійскае выданне EUobserver апублікавала аўдыёзапісы размоў былога кіраўніка Камітэта дзяржбяспекі Беларусі Вадзіма Зайцава (2008-2012 года), у якіх, між іншым, абмяркоўвалася магчымасць забойства Шарамета. Як сцвярджае выданне, размовы запісваліся схаванай прыладай 11 красавіка 2012 года падчас час інструктажу супрацоўнікаў Контртэрарыстычнага падраздзялення КДБ «Альфа» ў менскім офісе Зайцава.
«Мы павінны папрацаваць над Шараметам, які з'яўляецца вялікім галаўным болем... Мы закладзём [бомбу] і гэтак далей, і гэтага клятага пацука разнясе на чортавыя кавалкі: ногі - у адзін бок, рукі - у іншы. Калі ж усё будзе [выглядаць] як па натуральных прычынах, то людзі не зразумеюць сігнал... Прэзідэнт [Лукашэнка] чакае гэтых аперацый», - цытуе Зайцава EUobserver.
Як вынікае са слоў былога кіраўніка КДБ, у 2012 годзе рыхтаваліся аперацыі ліквідацыі шэрагу палітычных апанентаў Лукашэнкі на тэрыторыі іншых дзяржаў. Як адзначыў Зайцаў, задачу арганізацыі палітычных забойстваў перад КДБ паставіў непасрэдна Лукашэнка. На гэта ён вылучыў $1,5 млн.
Нацыянальная паліцыя Украіны заявіла, што атрымала інфармацыю выдання EUobserver. На гэты момант Нацпаліцыя атрымала дазвол на правядзенне следчых дзеянняў у адной з еўрапейскіх краін, аднак не ўдакладніла, у якой менавіта.