Імпартазамяшчэнне ад беларускіх улад зазнала крах

Айчынных тавараў на паліцах крам зноў стала менш, чым імпартных.

Айчынных тавараў у аб'ёме раздробнага гандлю далей становіцца менш, чым імпартных. У першай палове гэтага года дзель беларускіх харчовых тавараў у крамах знізілася на 0,8 пункта ў параўнанні з першым паўгоддзем 2020-га, а нехарчовых - на 1,4 пункта, паведамляе zerkalo.io.

Беларускія ўлады надаюць асаблівую ўвагу павелічэнню дзелі айчыннай прадукцыі на паліцах крам. У канцы мінулага года Міністэрства антыманапольнага рэгулявання і гандлю (МАРГ) зацвердзіла абавязковы асартыментны пералік тавараў, у тым ліку айчыннай вытворчасці, якія павінны быць у гандлёвых пунктах.

У лютым 2021 года МАРГ апублікаваў рэкамендацыі для гандлёвых арганізацый аб тым, каб тыя выкладвалі беларускія тавары «ў візуальна і фізічна даступных месцах» і пазначалі іх спецыяльнай шыльдай або надпісам «Зроблена ў Рэспубліцы Беларусь/Зроблена ў Беларусi».

Камітэт дзяржаўнага кантролю заяўляе, што «праблематыка наяўнасці беларускіх тавараў у гандлёвай сетцы знаходзіцца ў апошнія гады ў сфэры асаблівай увагі» ўстановы. У першым паўгоддзі КДК праводзіў сэлекцыйныя праверкі гандлёвых сетак, каб вывучыць сітуацыю з продажам айчынных спажывецкіх тавараў.

Нягледзячы на ўсе намаганні, дзель айчыннай прадукцыі на паліцах крам далей скарачаецца. Дзель харчовых тавараў беларускага вырабу ў гандлёвых аб'ектах, за выняткам мікраарганізацый, скарацілася з 77,2% за першую палову 2020 года да 76,4% за той жа перыяд гэтага года. Пры гэтым за першае паўгоддзе 2021-га раздробнае таварнае абарачэнне прадуктаў харчавання, напояў і тытунёвай прадукцыі ў супастаўных цэнах вырасла на 1,3% у гадавым вылічэнні.

Дзель нехарчовых айчынных тавараў знізілася з 41,5% у першай палове мінулага года да 40,1% у тым жа перыядзе гэтага.

Зніжэнне колькасці беларускіх тавараў на паліцах крам у параўнанні з імпартнымі доўжыцца шмат гадоў. З 2010 года дзель айчынных тавараў у раздробным гандлі скарацілася 70,2% да 55,8% у 2020-м. Калі зніжэнне долі харчовых тавараў за гэты час было на 6,2 пункта да 76,8% за 2020 год, то нехарчовых - 22,6 пункта да 35,9%.

У планах урада павялічыць да 2025 года дзель айчынных харчовых тавараў да 80%, а нехарчовых - да 63%.