Формула медыкаў: Страйк = здароўе беларусаў

Давайце зробім сабе адпачынак на месяц.

Колькасць захварэлых і памерлых у Беларусі паводле неафіцыйных звестак працягвае расці.

Шпіталі перапоўнены як у сталіцы, так і на перыферыі. Сістэма аховы здароўя працуе на мяжы як чалавечых, гэтак і тэхнічных рэсурсаў. Апаратаў не стае, медыкі захворваюць, бо немагчыма працаваць у "чырвонай" зоне ў тры змены, піша тэлеграм-канал COVID-19 BY.

У гэтай, здавалася б, катастрафічнай сітуацыі "ўлада" касуе маскавы рэжым, а так званая "статыстыка" працягвае бязбожна хлусіць.

Да нашай невялікай радасці беларусы, якія звыкліся чакаць ад "улады" толькі ўсякага кшталту падстаў, правільна адрэагавалі на дурасць міністэрства аховы здароўя: хуценька надзелі маскі.

Але і гэтага ўжо нядосыць. Пры той нагрузцы, якую адчуваюць на сабе медыкі і стацыянары, толькі неадкладнае імклівае зніжэнне штодзённай колькасці захварэлых можа стабілізаваць сітуацыю і выратаваць беларусаў ад нацыянальнай трагедыі.

Пакуль "вярхі" з іх нізіннымі пасыламі супраціўляюцца разважнасці з усіх сваіх сіл, беларусы, ратуючы сябе і сваіх блізкіх, павінны пайсці на рашучыя меры, каб не столькі перамагчы ў гэтай сутычцы, але проста выжыць.

Беларускае аб'яднанне рабочых учора абвясціла дату пачатку Агульнарэспубліканскага страйку. Паводле заявы БАР, паўсюдны страйк пачнецца 1 лістапада. Прымаючы да ўвагі сітуацыю з covid-19, страйк з'яўляецца яшчэ адной нагодай застацца дома і даць магчымасць выратаваць сябе і жыцці іншых беларусаў.

Для кожнага з нас няма нічога даражэйшага за нашае ўласнае жыццё. Няхай кожная ваша пастанова абапіраецца на гэтую каштоўнасць. Як гэта не назаві - "страйк", "народны карантын", ды хоць "адпачынак на месяц" - застаньцеся дома. Гэта можа выратаваць тысячы жыццяў беларусаў.

Заставайцеся дома! Будзьце здаровыя! Страйку быць!