«Нам давялося прадаць дачку»: у Афганістане пачаўся масавы голад

Палова насельніцтва краіны сутыкнулася з вострай нястачай прадуктаў.

Мільёны афганцаў будуць галадаць, калі не прыняць тэрміновыя меры, папярэджвае Сусветная харчовая праграма ААН. Паводле яе звестакблізуя 22,8 млн чалавек (гэта палова насельніцтва Афганістана) ужо сутыкаюцца з вострай нястачай прадуктаў, 3,2 млн з іх – гэта дзеці.

Карэспандэнты BBC знайшлі шматдзетную сям'ю ў прадмесці Герата, якая прадала сваю нованароджаную дачку, каб пракарміць іншых дзяцей.

"У нас у доме няма ні мукі, ні масла. Мы былі вымушаны гэта зрабіць", - расказаў бацька сямейства.

Дзяўчынку прадалі за 500 даляраў, паведамляе BBC. За гэтыя грошы сям'я зможа пражыць некалькі месяцаў. Калі нованароджаная навучыцца хадзіць, яе аддадуць пакупніку. Ён абяцаў ажаніць яе са сваім сынам. Але гарантый, што гэта праўда, няма.

Са слоў карэспандэнтаў BBC, гэта не адзіная сям'я ў Афганістане, якая пайшла на такія меры. "У краіне адзін з самых цяжкіх гуманітарных крызісаў у свеце, – заявіў выканаўчы дырэктар ВПП Дэвід Бізлі. – Справа набліжаецца да катастрофы".

У жніўні пасля вываду замежных войскаў з Афганістана ўлада захапіла радыкальны ісламісцкі рух "Талібан". Ягонае кіраванне дагэтуль афіцыйна не прызнала ніводная з краіна свету.

Гэта пазбавіла жыхароў Афганістана дапамогі, якая раней паступала ад краін Еўропы, а таксама з Сусветнага банка і Міжнароднага валютнага фонду. Дзель замежных уліванняў дасягала 40% ВУП.

У краіне пагоршыўся харчовы і лекавы крызіс. Кошт прадуктаў рэзка ўзрос. Акрамя таго, ужо другі раз за чатыры гады ў Афганістане наступіла наймацнейшая засуха. У выніку, паводле інфармацыі ААН, штодня дастаткова ежы атрымлівае толькі 5% афганскіх сем'яў.

У верасні на канферэнцыі ў Жэневе міжнародная супольнасць абавязалася выдаць больш за 1 млрд даляраў на падтрымку афганцаў. Траціна гэтых грошай павінна пайсці на рэалізацыю Сусветнай харчовай праграмы. Але ВПП паведамляе, што пакуль атрымала толькі частку выдзеленых грошай, і гэта "кропля ў моры".