У Facebook назвалі прычыну маштабнага збою ў працы сацсетак
13- 5.10.2021, 9:51
- 7,246
Марк Цукербэрг выбачыўся перад карыстальнікамі.
Праца Facebook, Instagram і WhatsApp адноўленая пасля глабальнага збою, які працягваўся амаль шэсць гадзін.
Кампанія Facebook, якой належаць Instagram і WhatsApp, паведаміла аб паступовым аднаўленні работы 5 кастрычніка а 01:30 паводле менскага часу.
Шасцігадзінны збой у працы сэрвісаў адбыўся праз няўдалую змену канфігурацыі магістральных маршрутызатараў, якія размяркоўваюць трафік паміж цэнтрамі апрацоўкі звестак, напісаў у сваім блогу Facebook. У кампаніі дадалі, што збой сеткавага трафіку "эфектам даміно парушыў сувязь паміж дата-цэнтрамі".
Facebook таксама напісаў, што ўцечкі звестак карыстальнікаў у выніку збою не было.
Заснавальнік кампаніі Марк Цукербэрг папрасіў прабачэння ў карыстальнікаў за збой.
"Я ведаю, наколькі вы залежныя ад нашых паслуг, каб заставацца на сувязі з людзьмі, якія вам дарагія", - напісаў ён у фэйсбуку.
Раней адбыўся глабальны збой у працы Facebook, а таксама Instagram і WhatsApp, якія належаць кампаніі. Онлайн-платформа Downdetector, якая адсочвае статус вэб-сайтаў у рэжыме рэальнага часу, паведаміла, што збой Facebook - найбуйнейшы з тых, якія фіксаваў праект. Сэрвіс атрымаў больш за 10 мільёнаў паведамленняў аб збоі.
Журналістка The New York Times Шыра Фрэнкель у сваім твітэры паведаміла, што ў супрацоўнікаў Facebook не працуюць электронныя пропускі, яны не могуць трапіць у офіс і не могуць ацаніць маштабы збою.
Са звестак Bloomberg, Марк Цукербэрг за час збою страціў больш за 6 млрд даляраў чыстага капіталу. Яго багацце знізілася да $121,6 млрд, у выніку заснавальнік Facebook апусціўся ў рэйтынгу найбагацейшых людзей свету з трэцяга на пяты радок, які раней займаў Біл Гейтс.