У Францыі выбралі найлепшыя фільмы 2021 года

Рэйтынг склала адно з самых прэстыжных выданняў у свеце кіно - французскі «Cahiers du Cinéma».

Французскі кіначасопіс «Cahiers du Cinéma» апублікаваў спіс найлепшых фільмаў 2021 года. У яго ўвайшлі дзевяць стужак, у тым ліку «Французскі веснік» Уэса Андэрсана і «Спакуса» Пола Верхавена, паведамляецца ў твітары выдання, піша РБК.

У спіс найлепшых фільмаў, паводле версіі «Cahiers du Cinéma», уваходзяць фільмы, якія з'явіліся ў французскім пракаце за апошнія 12 месяцаў.

Топ фільмаў са спісу «Cahiers du Cinéma»

«Першая карова», рэж. Келі Райхардт

Першае месца дасталася драме амерыканскага рэжысёра. Стужка, заснаваная на рамане Джонатана Рэйманда «Палова жыцця», распавядае пра мужчынскае сяброўства і зараджэнне капіталізму ў Амерыцы. Драматычная гісторыя пра кухара Кукі Фігавіца і кітайцы Лю, якія будуюць супольны бізнэс - пякарню, поспех якой залежыць ад каровы мясцовага багатага землеўладальніка.

«Анэт», рэж. Леас Каракс

Фільм расказвае гісторыю стасункаў стэндап-коміка Генры і опернай спявачкі Эн. Пара выхоўвае дачку Анэт і перажывае разлад у стасунках. У спробах усё наладзіць шлюбная пара разам з дачкой адпраўляецца ў круіз на яхце. Эн гіне з віны Генры, а Анет набывае асаблівы дар - пры святле Месяца яна пачынае спяваць голасам сваёй загінулай маці.

«Памяць», рэж. Апітчатпон Вірасетакул

Фільм тайскага рэжысёра выбраны ў якасці прэтэндэнта ад Калумбіі ў намінацыі «Найлепшы фільм на замежнай мове» на прэміі «Оскар 2022». Джэсіка (Тыльда Суінтан) прыязджае ў Калумбію, каб даглядаць сястру, якая знаходзіцца ў стане сну. Неўзабаве пачынаюць адбывацца дзіўныя рэчы: Джэсіку пераследуе дакучлівы гук, мучыць бессань, і яна ўсё больш пачынае губляць сувязь з рэальнасцю.

Сядзь за стырно майго аўтамабіля рэж. Русукэ Хамагуці

Фільм — экранізацыя апавядання Харукі Муракамі са зборніка «Мужчыны без жанчын» — атрымаў прыз за найлепшы сцэнар на Канскім фестывалі 2021. Кінастужка расказвае гісторыю стасункаў паміж тэатральным рэжысёрам, якога запрашаюць паставіць п'есу Чэхава «Дзядзька Ваня» на тэатральным фестывалі ў Хі, і маўклівай дзяўчынай у кепцы.

«Суперзорка», рэж. Бруна Дзюмон

Гісторыя пра смелую і цынічную тэлежурналістку Франс дэ Мер (Леа Сэйду), якая імкнецца ў гарачыя месцы, хаміць прэзідэнту на прэс-канферэнцыях і атрымлівае сваё ток-шоў на галоўным канале краіны. Але раптам адна памылка мяняе яе жыццё: Франс губляе свой статус і становіцца каралевай дызлайкаў.

«Французскі веснік», рэж. Уэс Андэрсан

Замалёўкі з жыцця рэдакцыі штотыднёвіка «Ліберці. Канзас іўнінг сан», апошні выпуск якога рыхтуецца да друку ў перыяд студэнцкіх хваляванняў у Францыі. Стужка з уражальным акторскім складам: Біл Мюрэй (галоўны рэдактар), Оўэн Уілсан (рэпарцёр), Джэфры Райт і Фрэнсіс Макдарманд (рэдактары), а таксама Цімаці Шаламэ, Бенісіа Дэль Тора, Эдрыен Броўдзі, Тыльда Суінтан, Леа Сэйду і іншыя («Ліберці»). Якім атрымаўся «Французскі веснік», можна прачытаць тут.

У топ-9 найлепшых фільмаў таксама ўвайшлі:

«На абардаж!», рэж. Гіём Брак;

«Дзяўчына і павук», рэж. Рамон і Сільван Цюрхер;

«Халодны разлік», рэж. Пол Шродэр.

Часопіс «Cahiers du Cinéma» («Кінасшыткі») быў заснаваны ў 1951 годзе. У выданні пачыналі свой шлях многія вядомыя дзеячы кінематографа, у тым ліку Жан-Люк Гадар, Франсуа Труфо, Клод Шаброль.