Хаўруснікі Арменіі павіншавалі Азербайджан з перамогай у карабахскім канфлікце
- 29.11.2021, 18:37
- 16,666
Краіны-сябры АДКБ павіншавалі народ Азербайджана «з вызваленнем акупаваных тэрыторый».
Хаўруснікі Арменіі па Арганізацыі Дамовы аб калектыўнай бяспецы (АДКБ) павіншавалі Азербайджан з перамогай у Другой карабахскай вайне. Пра гэта гаворыцца ў выніковай дэкларацыі 15-га саміту Арганізацыі эканамічнага супрацоўніцтва (АЭС), які прайшоў у сталіцы Туркменістана Ашхабадзе, паведамляе lenta.ru.
У заяве саміту, да якой таксама далучыліся краіны-сябры АДКБ Казахстан, Кыргызстан і Таджыкістан, удзельнікі АЭС павіншавалі ўрад і народ Азербайджана «з вызваленнем акупаваных тэрыторый і аднаўленнем тэрытарыяльнай цэласнасці краіны».
Там таксама адзначылі, што перамога Баку ў вайсковым канфлікце з Ерэванам «пракладзе шлях да ўстойлівага міру і эканамічнага росквіту ў каўказскім рэгіёне праз устанаўленне добрасуседскіх дачыненняў», і заклікалі інвеставаць у праекты аднаўлення на азербайджанскай тэрыторыі ў Нагорным Карабаху.