У Беларусі могуць увесці карткі на тавары

Навошта і каму іх плануюць выдаваць.

Чыноўнікі могуць унесці змены ў нашумелую пастанову ўрада №100, якой увялі столь па росце коштаў на многія сацыяльна значныя тавары і лекі. Пра гэта заявіў намеснік прэм'ер-міністра Аляксандр Субоцін. З ягоных слоў, чыноўнікі прыдумалі альтэрнатыву гэтаму дакументу. Для гэтага могуць увесці бонусныя карткі на тавары для пенсіянераў, маламаёмасных, шматдзетных сем'яў, піша zerkalo.io.

Якія абмежаванні па росце коштаў (не) дзейнічаюць

У канцы лютага сёлета чыноўнікі прынялі пастанову №100. Ім увялі жорсткае рэгуляванне цэн на 62 тыпы сацыяльна значных тавараў: шматлікая гародніна, малочная прадукцыя, крупы, а таксама на 50 асобных айчынных лекаў.

З 24 лютага (і да канца месяца) на іх забаранялі падвышаць кошты, а з 1 сакавіка рост мог адбывацца не больш чым на 0,2% у месяц. Перавышаць гэту столь вытворцам, імпарцёрам і гандлю магчыма на пастанову Камісіі ў пытаннях дзяржрэгулявання цэнаўтварэння пры Саўміне. Чыноўнікі неаднаразова карысталіся гэтай магчымасцю, у тым ліку каб не дапусціць дэфіцыту тавараў. Перавысіць столь у цэнах дазвалялі сярод іншага на рыс, сланечнікавы алей, мясе і мясапрадукты, малочныя прадукты. У сітуацыі, калі ўлады рэгулярна дазваляюць выходзіць за ўсталяваны калідор роста коштаў, узнікае пытанне, ці не варта скасаваць дзеянне пастановы №100.

Гэты дакумент выклікае нямала пытанняў у вытворцаў, імпарцёраў і гандлю.

«Уплывае на фінансавы стан прадпрыемстваў». Якую альтэрнатыву прыдумалі чыноўнікі

Аляксандр Субоцін заявіў, што ўвядзенне пастановы №100 – вымушаная мера. На яго думку, яна спрацавала, аднак «уплывае на фінансавы стан прадпрыемстваў». Ён таксама адзначыў, што наконт прадаўжэння або скасавання дзеяння пастановы №100 ёсць розныя меркаванні.

«На гэты момант існуе меркаванне, што пастанова №100, хутчэй за ўсё, застанецца. Але пералік сацыяльна значных тавараў мы скароцім да 17, прыбяром бескасцёвае мяса і іншыя пазіцыі. Пакідаем хлеб, малако, натуральнамалочную прадукцыю і гэтак далей», — сказаў Аляксандр Субоцін.

Пры гэтым намеснік прэм'ер-міністра анансаваў магчымыя змены.

«Але мы разумеем, што пастанова №100, хутчэй за ўсё, сябе зжыве як нарматыўна-прававы акт, і мы, напэўна, пяройдзем да адраснай дапамогі, што не аднойчы абмяркоўвалася. У якім фармаце гэта будзе? Думаю, хуткім часам вы ўбачыце. З сеткамі размова на гэтую тэму ўжо адбылася. Магчыма, будуць нейкія бонусныя карткі для пенсіянераў, маламаёмасных, шматдзетных сем'яў», - заявіў Аляксандр Субоцін.

Нагадаем, у Беларусі працягваюць падаць рэальныя пенсіі, якія разлічваюць з папраўкай на інфляцыю.

Раней у пачатку верасня ў Беларусі да канца года працягнулі дзяржрэгуляванне коштаў на некаторыя сацыяльна значныя тавары. Сярод іх аказаліся мясныя субпрадукты, свежая рыба, маргарын, пярлоўка, часнок — усяго 8 пазіцый. На гэтыя прадукты ўстанавілі гранічныя максімальныя надбаўкі. Каб пазбегнуць дэфіцыту прадуктаў, на якія ўсталявалі столь па росце коштаў, час ад часу чыноўнікі дазваляюць гандлю і вытворцам павысіць іх кошт.

У канцы жніўня Еўразійская эканамічная камісія ўзгадніла падаўжэнне тэрміна дзяржаўнага рэгулявання коштаў на сацыяльна значныя тавары ў Беларусі да 31 снежня. Без адабрэння ЕЭК наша краіна не магла падоўжыць устанаўліваць столь па росту цэн.