Неграмадзяне ЗША могуць атрымаць права галасаваць на выбарах у Нью-Ёрку
14- 7.12.2021, 20:59
- 2,612
Уладальнікам грын-карт могуць дазволіць галасаваць на выбарах.
Улады Нью-Ёрка (ЗША) зарэгістравалі законапраект, які дазволіць неграмадзянам краіны галасаваць на мясцовых выбарах, чакаецца, што яго прымуць 9 снежня. Пра гэта 23 лістапада паведамляе The New York Times.
Гарадская рада плануе ўхваліць законапраект, які дазволіць больш за 800 тысяч неграмадзян Нью-Ёрка рэгістравацца ў якасці чальцоў палітычных партый і галасаваць на муніцыпальных выбарах пры ўмове, што яны з'яўляюцца трымальнікамі грын-карты або маюць права працаваць у ЗША.
Неграмадзяне па-ранейшаму не змогуць галасаваць на выбарах прэзідэнта ЗША, а таксама абіраць чальцоў Кангрэса ЗША, губернатараў, суддзяў і заканадаўцаў штатаў, паведамляе Independent.
Прыхільнікі прыняцця законапраекта сцвярджаюць, што імігранты, якія пражываюць у горадзе на законных падставах, павінны мець права выбіраць мэра і сваіх прадстаўнікоў у гарадской радзе.
Праціўнікі кажуць, што закон паслабіць выбарчыя правы грамадзян і падарве каштоўнасць амерыканскага грамадзянства.