Дзяржсакратар Савета бяспекі Беларусі прыстрашыў Украіну «лакальным канфліктам»

Яму не спадабалася правядзенне вучэнняў ля беларуска-ўкраінскай мяжы.

Дзяржаўны сакратар Савета бяспекі Беларусі Аляксандр Вальфовіч абвінаваціў Украіну ў «недружалюбнай пазіцыі» і прыстрашыў «лакальным канфліктам», паведамляе БелТА.

«Мы ў большай ступені надавалі ўвагу абароне заходніх рубяжоў - з Польшчай, Літвой. Сёння наша паўднёвая суседка Украіна пачала займаць недружалюбную пазіцыю ў дачыненні да Беларусі» - сказаў ён.

З ягоных слоў, ва Украіне нібыта «спрабуюць пад выглядам барацьбы з незаконнай міграцыяй праводзіць нейкія вучэнні».

«Гэта можа прывесці да лакальнага канфлікту. Вельмі б гэтага не хацелася», - сказаў ён.

Вальфовіч таксама абвінаваціў Украіну «ў парушэнні мяжы баявым верталётам УСУ».

Беларускі дыктатар Аляксандр Лукашэнка ў каментары інфармацыі аб магчымым уварванні Расеі ва Украіну, заяўляў, што «нейкія развязкі» будуць пасля Новага года.

З ягоных слоў, планы NATO «непрымальныя» і для Беларусі, і для Расеі, а за гэты месяц «яшчэ шмат памяняецца».