Навукоўцы распавялі, як род дзейнасці звязаны з ужываннем алкаголю

Праведзены аналіз па 353 прафесіях.

Злоўжыванне алкаголем і звязаныя з ім наступствы застаюцца сур'ёзнай праблемай грамадскай аховы здароўя, для барацьбы з якой неабходна вызначаць фактары, якія спрыяюць п'янству. З пункту гледжання індывіда алкагалізм павышае рызыку фізічнай і псіхічнай шкоды, што можа прывесці да непажаданых наступстваў, такіх як страта даходу і звальненне. Алкаголь таксама звязаны са зніжэннем прадукцыйнасці, прагуламі, грэблівым стаўленнем і антысацыяльнымі паводзінамі, гэта значыць, прыносіць праблемы і працадаўцам, піша сайт Naked science.

Паводле ацэнак спецыялістаў з Вялікай Брытаніі, зніжэнне прадукцыйнасці праз алкаголь каштавала эканоміцы Злучанага Каралеўства 7,3 мільярда фунтаў стэрлінгаў у 2009-2010 гадах і 9,2 мільярда ў 2018-м. Але прадстаўнікі якіх прафесій больш схільныя да п'янства? Так звесткі фінскага рэестра медыцынскіх паслуг нядаўна паказалі, што работнікі рамесных, будаўнічых галін і сфер надання паслуг зазнавалі найбольшую рызыку шпіталізацыі або смерці, галоўным чынам праз алкаголь.

Мэта аўтараў новага перакрыжаванага даследавання палягала ў тым, каб высветліць, ці звязаныя пэўныя прафесіі са злоўжываннем алкаголем. У ім удзельнічалі 100 817 работнікаў 40-69 гадоў (46% - жанчыны, сярэдні ўзрост - 55 гадоў), звесткі якіх ўзялі з Біябанка Вялікай Брытаніі. Таксама добраахвотнікі запоўнілі анкеты, прайшлі клінічныя вымярэнні, далі біялагічныя ўзоры (кроў, мачу і сліну) і доступ да сваіх медкарт. Усяго навукоўцы з Ліверпульскага ўніверсітэта вывучылі 353 прафесіі і ацанілі, ці ёсць сувязь паміж п'янствам і полам, а таксама тое, наколькі адрозненні ў статусе спажывання спіртнога можна растлумачыць родам заняткаў. Вынікі апублікаваныя ў часопісе BMC.

Непітушчых у даследаванне не ўключылі. Усіх удзельнікаў папрасілі ацаніць сваё спажыванне алкаголю за тыдзень або месяц, а каб разлічыць прыблізныя аб'ёмы выпітага, узялі юніты (адзін юніт роўны 10 мілілітрам этанолу). Для жанчын празмернае захапленне алкаголем вызначылі як больш за 35 юнітаў на тыдзень (эквівалентнае тром з паловай бутэлькам віна або 17 пінтам піва слабага мацунку), для мужчын - больш за 50 юнітаў (пяць бутэлек віна ці 25 пінт піва слабага мацунку). Парогавыя значэнні заснаваныя на звестках аб тым, што ўжыванне алкаголю ў такой колькасці мае для людзей высокую рызыку фізічнай або псіхічнай шкоды.

У кантрольную групу ўвайшлі людзі, якія і не ўстрымліваліся ад спіртнога, то бок, выпівалі больш за адзін юніт на тыдзень, але і не дасягалі стадыі злоўжывання. Да катэгорыі моцна пітушчых, то бок, залежных, аднеслі 17 907 чалавек, з якіх 5154 (28,8%) былі жанчынамі.

У выніку 77 прафесій выявіліся звязаныя з узроўнем ужывання алкаголю сярод пітушчых. У так званыя групы рызыкі навукоўцы ўключылі прыбіральшчыкаў і мэнэджараў (павышаны 2,81 разы рызыка). А таксама рабочых рознай спецыялізацыі са сферы будаўніцтва (1,7-2,07), памочнікаў са спартыўнай галіны і сферы арганізацыі адпачынку (2,07), персанал бара (2,06), будаўнікоў (1,66) і кіроўцаў пагрузчыкаў (1,56) - увогуле, прадстаўнікоў спецыяльнасцяў, якія патрабуюць галоўным чынам фізічнай працы.

Між тым радзей за ўсё пілі святары (рызыка падвышаная ў 0,20 разу), фізікі, геолагі і метэаролагі (0,40), лекары (0,40), медсёстры (0,82), бібліятэкары (0,65), выкладчыкі ВНУ (0,62), архітэктары (0,52), дызайнеры і распрацоўнікі (0,62), а таксама школьныя сакратары (0,45).

Што тычыцца гендэрных адрозненняў, то сярод прыбіральшчыкаў і мэнэджараў яе не выявілі. Аднак мужчыны, занятыя ў сферах вытворчай уборкі і ўтылізацыі смецця, а таксама аўтаэлектрыкі, бармэны і тынкоўшчыкі выявіліся больш схільнымі да алкагалізму, чым іх калегі-жанчыны. Таксама сярод прадстаўніц прыгожага полу алкагалізм сустракаўся ў работніц складоў (2,48), рыэлтараў (2,24), інструктараў па ваджэнню (2,22) і персаналу бара (2,07), а больш за ўсё трапілі пад яго ўплыў карпаратыўныя мэнэджары і жанчыны, якія займаюць кіроўныя пасады ў кампаніях.

«Выяўленыя намі адрозненні паміж мужчынамі і жанчынамі могуць паказваць на тое, як працоўнае асяроддзе, а таксама пол і іншыя складаныя фактары ўплываюць на стаўленне да алкаголю, - адзначыў кіраўнік даследавання Эндру Томпсан. - Захады, накіраваныя на развязанне праблемы п'янства на працоўных месцах у пэўных прафесійных сферах, могуць прынесці карысць як асобным людзям, так і эканоміцы агулам, палепшыўшы дабрабыт супрацоўнікаў і ўскосна падвысіўшы прадукцыйнасць».