Еўрадэпутаты заклікаюць знізіць візавы збор для беларусаў «да сімвалічнай сумы»

Зніжэнне візавага збору стала б сігналам падтрымкі ЕЗ беларускага народа ў яго барацьбе за дэмакратыю.

Дэпутаты Еўрапарламента заклікаюць Еўракамісію знізіць візавы збор за шэнгенскую візу. Гаворка пра гэта ідзе ў лісце, які група з 20 еўрадэпутатаў накіравала камісару еўрапейскай палітыкі суседства і перамоў аб пашырэнні Оліверу Вархею, паведамляе tut.by.

Дэпутаты падкрэсліваюць важнасць паглыблення міжасобасных кантактаў паміж грамадзянамі Беларусі і дзяржаў - сябраў ЕЗ.

«Летась, усяго за месяц да прэзідэнцкіх выбараў у Беларусі, мы віталі пагадненне аб спрашчэнні візавага рэжыму і рэадмісіі з Беларуссю, - гаворыцца ў лісце. - Тады ж мы выказалі заклапочанасць тым, што збор у 35 еўраў за апрацоўку візавай заявы для беларускага народа пры мінімальным заробку менш за 200 еўра - гэта выклік. Гэтую нашу перакананасць яшчэ больш умацавалі цяперашнія абставіны, якія ўключаюць у сябе жорсткасць і пераслед з боку рэжыму Лукашэнкі, што ў шматлікіх выпадках прыводзіць да спынення працоўных дачыненняў, адлічэнняў студэнтаў з навучальных устаноў і накладанню вялікіх штрафаў або нават турэмнага зняволення за падтрымку дэмакратычных пратэстаў. Існуе візавы збор ЕЗ для беларусаў, якія імкнуцца захаваць свае сувязі з ЕЗ, занадта высокі і павінен быць зніжаны да сімвалічнай сумы».

У лісце адзначаецца, што беларускія грамадзяне ў параўнанні з грамадзянамі іншых краін Усходняга партнёрства ў 2018-2019 гадах атрымлівалі найбольшую колькасць шэнгенскіх візаў на душу насельніцтва.

«Аднак у апошнія два-тры гады колькасць віз, якія выдаюцца беларусам, скарачаецца. У сувязі з пандэміяй COVID-19 і палітычным рашэннем Лукашэнкі аб закрыцці беларускіх межаў для пасажырскіх перавозак з краінамі - сябрамі ЕЗ (Латвіяй, Літвой і Польшчай) прагнозы на будучыню не аптымістычныя, - гаворыцца ў лісце. - Мы просім вас звярнуць увагу на рызыку зніжэння міжасобасных кантактаў і прыняць актыўныя меры ў падтрыманні і ўмацаванні эканамічных, культурных і навуковых сувязяў беларускага народа з грамадзянамі краін ЕЗ. Зніжэнне візавага збору да сімвалічнай сумы ў святле пагаршэння ўзроўню жыцця ў Беларусі стала б моцным сігналам падтрымкі Еўрапейскім звязам беларускага народа ў яго барацьбе за дэмакратыю. Гэта таксама дало б адпор прапагандзе рэжыму Лукашэнкі супраць ЕЗ».