Кіраўнік вядучай фракцыі Еўрапарламента запатрабаваў замарозіць рахункі расейскіх алігархаў і адключыць Расею ад SWIFT

Масква прадаўжае небяспечныя правакацыі.

Еўразвязу і ЗША варта зрабіць больш жорсткім санкцыі ў дачыненні да Расеі ў выпадку эскалацыі канфлікту на ўсходзе Украіны ці пагаршэння здароўя Аляксея Навальнага, які знаходзіцца ў калоніі. Пра гэта ў інтэрв'ю медыягрупе Funke заявіў старшыня Еўрапейскай народнай партыі Манфрэд Вэбер.

Старшыня вядучай фракцыі Еўрапарламента адзначыў, што Масква прадаўжае небяспечныя правакацыі. Размяшчэнне расейскіх войскаў паблізу мяжы з Украінай - гэта выпрабаванне для Захаду, мяркуе Вэбер. Палітык дапусціў у рамках магчымых новых санкцыяў замарожванне рахункаў расейскіх алігархаў і адключэнне Расеі ад банкаўскай сістэмы SWIFT. Гэта можа абцяжарыць далейшае будаўніцтва газаправода «Паўночны струмень – 2» з Расеі ў Нямеччыну па дне Балтыйскага мора.

Раней агенцтва Bloomberg паведамляла, што Вашынгтон разглядае ўвядзенне санкцый супраць асоб з найбліжэйшага атачэння прэзідэнта Расеі Уладзіміра Пуціна. Акрамя таго, паводле звестак СМІ, амерыканскія ўлады дапускаюць высылку некалькіх расейскіх дыпламатаў.

Сітуацыя ў зоне канфлікту на Данбасе, дзе практычна перастала выконвацца замірэнне, абвастрылася ў сакавіку. Паступаюць шматлікія паведамленні аб канцэнтрацыі расейскіх войскаў ля межаў з Украінай. Расейскія ўлады сцвярджаюць, што гэтыя войскі ні для каго не ўяўляюць пагрозы. Прэзідэнт Расеі Уладзімір Пуцін у размове з канцлеркай Нямеччыны Ангелай Мэркель падкрэсліў, што Масква ўжывае захады для гарантавання ўласнай бяспекі.