Пасол Швейцарыі наведаў Наталлю Хершэ

Смелая жанчына падзякавала ўсім, хто яе падтрымлівае.

Пасол Швейцарыі ў Менску Клод Альтэрмат наведаў сваю суайчынніцу, ураджэнку Беларусі Наталлю Хершэ, якая адбывае пакаранне ў гомельскай папраўчай калоніі №4, пішуць naviny.online.

Візіт адбыўся 9 красавіка.

«Нягледзячы на няпростыя ўмовы, справы ў нашай грамадзянкі ідуць добра. Наталля зноў дзякуе ўсім, хто падтрымлівае яе тут і ў іншых краінах», - напісаў дыпламат у «Твітэры».

Каментуючы ў іншым допісу паведамленне швейцарскай місіі ў ЕЗ пра важнасць развіцця чыгуначнага транспарту для паляпшэння экалагічнай сітуацыі, Альтэрматт адзначыў, што ездзіў у Гомель на суперсучасным («top modern») цягніку «Штадлер» вытворчасці швейцарскай кампаніі Stadlerrail у Фаніпалі.

7 снежня 2020 года суд Савецкага раёна Менска прызнаў Наталлю Хершэ вінаватай у супраціве супрацоўніку міліцыі (ч. 2 арт. 363 КК) і прысудзіў да 2,5 года пазбаўлення волі і выплаце 1 000 рублёў пацярпеламу сілавіку. На судовую пастанову, 19 верасня падчас несанкцыянаванай акцыі (жаночага маршу) каля Камароўскага рынку 51-гадовая Хершэ сарвала балаклаву з 22-гадовага сілавіка, «падрапала яму твар, прычыніўшы тым самым цялесныя пашкоджанні». Жанчына віну не прызнала.

Беларускія праваабаронцы лічаць Хершэ палітычнай зняволенай.

Паводле іх інфармацыі, асуджаная два разы аб'яўляла галадоўку. У студзені яна адмовілася ад ежы праз тое, што ёй не перадавалі пошту. Тады яе перавялі ў камеру з лепшымі ўмовамі, туды ж перадалі лісты. У апошні тыдзень лютага і першы тыдзень сакавіка Хершэ галадала праз тое, што родных не апавясцілі аб яе пераводзе ў гомельскую калонію. Акрамя таго, ёй зноў перасталі перадаваць лісты.