IT-гіганты Кітая знайшлі новы спосаб барацьбы з уладамі

Яны пачалі перавабліваць чыноўнікаў на працу.

IT-гіганты Кітая пачалі больш актыўна перавабліваць чыноўнікаў на працу. Яны знайшлі новы спосаб барацьбы, які дазволіў ім абараніцца ад ціску з боку ўладаў КНР, піша Financial Times.

Кампаніі наймаюць былых супрацоўнікаў з дзяржструктур - ад антыманапольных рэгулятараў да судоў. Так, у Alibaba Джэка Ма перайшлі тры высокапастаўленыя дзяржслужбоўцы, у Tencent і ByteDance - па два, у Ant Group і Meituan - па адным. Адным з тых, каго ўдалося перавабіць Alibaba, стаў былы намеснік дырэктара антыманапольнага бюро міністэрства гандлю краіны Цуй Шуфэн.

Менавіта ён параіў уладам не быць занадта жорсткімі да кампаніі Джэка Ма, калі ішло антыманапольнае расследаванне супраць яе. Іншы прыклад тычыцца юрыста Tencent, да гэтага ён 14 гадоў працаваў суддзёй у Наньшань. З 2018 да 2020 года кампанія выйграла ў гэтым судзе амаль 94 працэнты спраў.

Летась у склад кіраўніцтва кампаній Кітая ўваходзіла больш за 4800 чалавек з досведам работы ва ўрадзе, два дзесяцігоддзі таму такіх было толькі 99. Чыноўнікі ідуць да IT-гігантаў, бо там заробкі ў тры-шэсць разоў большыя, чым на дзяржслужбе.

У красавіку дзяржаўнае ўпраўленне кантролю за рынкам КНР аштрафавала Alibaba на рэкордную ў гісторыі краіны суму - 18,22 мільярда юаняў (2,78 мільярда даляраў) за парушэнне антыманапольнага заканадаўства. Расследаванне пацвердзіла, што Alibaba праводзіла палітыку, што прымушала спажыўца карыстацца сваімі паслугамі «без права выбару».

Такое рашэнне рэгулятара рынак палічыў мяккім, таму акцыі кампаніі ўзляцелі, а багацце Ма вырасла на 2,3 мільярда даляраў.