Байдэн можа наведаць Балканы і Цэнтральную Еўропу

Аднак еўрапейскае турнэ амерыканскага прэзідэнта пачнецца ў Лондане.

Прэзідэнт ЗША Джо Байдэн у чэрвені можа прыбыць з візітам у Цэнтральную Еўропу.

Як паведамляе "Еўрапейская праўда", пра гэта паведаміла славацкае выданне Pravda са спасылкай на прадстаўніка амерыканскай дыпламатыі, які камунікуе на ўмовах ананімнасці.

Чакаецца, што Байдэн адправіцца ў еўрапейскае турнэ ў чэрвені - ягоны візіт звязаны перш за ўсё з правядзеннем саміту NАТО ў Брусэлі. Час сустрэчы кіраўнікоў дзяржаў Альянсу пакуль афіцыйна не абвешчаны, але, са звестак крыніц выдання ў штаб-кватэры NАТО, яна запланавана прыблізна на 14 чэрвеня.

Мяркуецца, што першым прыпынкам Байдэна ў Еўропе стане Лондан, дзе прэзідэнт ЗША сустрэнецца з прэм'ерам Вялікабрытаніі Барысам Джонсанам і атрымае аўдыенцыю ў каралевы Элізабэты II. Акрамя таго, у Байдэна плануюць візіт у адну з краін Усходняй Еўропы.

"Ва Усходняй Еўропе Байдэн можа пайсці двума шляхамі. Гэта будзе або Браціслава, або дзяржава на Балканах", - адзначыў суразмоўца выдання, дадаўшы, што шанцы Славакіі вышэйшыя.

"Калі прэзідэнт ЗША паедзе ў Браціславу, мы паведамім славацкім уладам на працягу двух тыдняў, найпазней - прыкладна ў пачатку траўня", - дадаў ён, адзначыўшы, што пастанова будзе залежаць ад развіцця падзей на ўкраінска-расейскай мяжы.

Са слоў крыніцы, Байдэн можа ўзяць удзел у прэстыжнай міжнароднай канферэнцыі GLOBSEC. Удзел у канферэнцыі даў бы Байдэну магчымасць сустрэцца з лідарамі Цэнтральнай і Усходняй Еўропы, адзначае выданне.

"Мяркуецца, што Байдэн мог бы правесці перамовы ў Браціславе, напрыклад, з прэзідэнтам Украіны Уладзімірам Зяленскім. Аднак галоўнай падзеяй, вядома, была б асноўная прамова кіраўніка Белага дома на канферэнцыі GLOBSEC", - піша выданне.