Экспэрт: Паўнавартасная амерыканская дыпмісія ў Беларусі наўрад ці з'явіцца

Санкцыі вяртаюцца.

На працягу доўгага часу не можа атрымаць свайго развязання гісторыя з прыбыццём у Беларусь Джулі Фішэр, зацверджанай на пасадзе амбасадаркі ЗША яшчэ ў канцы мінулага года. У чым прычына, і якія перспектывы яе з'яўлення? Пра гэта ў тэксце Язэпа Абзаватага для «Нашего мнения»:

- Для пачатку варта нагадаць, што ў Вашынгтоне беларускага амбасадара таксама няма. Фармальна, вядома, гэта можна тлумачыць нечаканай смерцю прызначанага на гэту пасаду Алега Краўчанкі, аднак няма сумневаў, што ў звычайных умовах замену яму ўжо даўно б знайшлі. У тым і фокус, што ўмовы не зусім, мякка кажучы, звычайныя.

Хоць Злучаныя Штаты не прызналі афіцыйна абвешчаных вынікаў леташніх прэзідэнцкіх выбараў у Беларусі, запушчаны роўна год назад працэс зацвярджэння кандыдатуры Джулі Фішэр, прапанаванай яшчэ Дональдам Трампам, быў працягнуты і завяршыўся 24 снежня прынясеннем ёю прысягі.

На днях яна паведаміла, што была гатовая прыехаць у Менск яшчэ ў пачатку года, аднак не змагла зрабіць гэта праз адсутнасць візы. Тым часам і ў канцы студзеня, і ў лютым кіраўнік беларускага знешнепалітычнага ведамства Уладзімір Макей выказваў зацікаўленасць афіцыйнага Менска ў канструктыўным узаемадзеянні з новай адміністрацыяй Белага дома, у тым ліку з удзелам амбасадаркі. Аналагічныя намеры пацвярджаў і амерыканскі бок.

У такіх умовах натуральным пачаткам дзейнасці Фішэр сталі сустрэчы з апанентамі дзейнай улады ў Варшаве і Вільні, якія прайшлі ў пачатку лютага. Зразумела, што яны адбыліся б у любым выпадку, але пры нармальным развіцці падзей, імаверна, усё ж пасля наведвання краіны знаходжання.

Вядома, што падчас гэтых перамоў Джулі Фішэр выказала негатыўную ацэнку, якую даў становішчу спраў у Беларусі ўрад США, і такая ацэнка не выклікала ў беларускага кіраўніцтва пачуцця глыбокага задавальнення.

Зрэшты, на першым часе яго каментары на гэты конт былі даволі стрыманымі. Між іншым, Макей прапанаваў амбасадарцы не абмяжоўвацца аднабаковай інфармацыяй, а атрымліваць таксама і афіцыйныя каментары. Але, магчыма, апошнія падзеі заахвоцілі беларускія ўлады да ўзмацнення жорсткасці падыходу. Ва ўсякім выпадку, ужо на наступны дзень пасля інфармацыі амбасадара аб візе Уладзімір Макей заявіў пра гатоўнасць прыняць яе толькі пры выразным вызначэнні ёю свайго статусу.

З яго слоў, «калі яна збіраецца прыехаць і рабіць заявы пра нелегітымнасць рэжыму, то які сэнс тады рабіць гэта? Я думаю, што ў такім выпадку яна будзе сядзець у пасольстве і нічога не рабіць і не зможа эфектыўна працаваць, у тым ліку і па ўсталяванні прамых кантактаў паміж структурамі Беларусі і ЗША».

З гэтым меркаваннем нельга не пагадзіцца. Без асобнага распараджэння беларускія чыноўнікі будуць пазбягаць нават знаходзіцца з амерыканскай амбасадаркай у адным памяшканні.

Акрамя таго, нагадаем, шматгадовая адсутнасць кіраўнікоў місій была выкліканая санкцыямі ЗША супраць «Белнафтахіму». Цяпер санкцыі вяртаюцца, так што знаходжанне амбасадаркі можа быць мімалётным.

Нарэшце, калі беларускае кіраўніцтва палічыць, што яго абвінавачванні ў адрас Вашынгтона з нагоды датычнасці да падрыхтоўкі патэнцыйнага тэракту абгрунтаваныя, то размова можа зайсці наогул пра разрыў дыпламатычных дачыненняў...

Сукупнасць усіх гэтых абставін падштурхоўвае да высновы, што ў цяперашняй сітуацыі паўнавартасная амерыканская дыпмісія ў Беларусі наўрад ці з'явіцца.