У Малдове ў выпадку датэрміновых выбараў перамогу можа здабыць партыя Маі Санду

65% апытаных лічаць, што датэрміновыя парламенцкія выбары павінны прайсці ў найбліжэйшыя шэсць месяцаў.

Калі б у наступную нядзелю ў Малдове адбыліся парламенцкія выбары, у парламент прайшлі б пяць партый.

Пра гэта сведчаць звесткі сацапытання, апублікаванага 21 красавіка Міжнародным рэспубліканскім інстытутам (IRI), паведамляе Newsmaker.

Паводле апытання IRI, найбольшая колькасць рэспандэнтаў гатовыя аддаць галасы за партыю прэзідэнта Маі Санду «Дзеянне і салідарнасць» (PAS) - 33%. На другім месцы выявілася Партыя сацыялістаў (19%), а на трэцім - «Наша партыя» (6%). Партыя «Шор» і «Платформа Годнасць і праўда» (DA) набралі па 5%. Сярод партый, якія не прайшлі б у парламент, лідзіруе Партыя камуністаў: за яе гатовыя прагаласаваць 3% апытаных. Дэмакратычная (ДПМ) і Ліберал-дэмакратычная (ЛДМП) набіраюць па 2% галасоў, а Ліберальная партыя - 1%.

65% апытаных уважаюць, што датэрміновыя парламенцкія выбары павінны прайсці ў найбліжэйшыя шэсць месяцаў (38% «цалкам згодны» з такім сцэнаром, а 28% «хутчэй згодныя»). Яшчэ 13% адзначылі, што яны «хутчэй не згодныя» з правядзеннем датэрміновых выбараў, а 16% выступілі катэгарычна супраць.

Апытанне праводзілася з 9 лютага да 16 сакавіка.