У Беларусі раскрытая «картэльная змова»?

МАРГ зацікавіўся сродкамі для аховы раслін.

Міністэрства антыманапольнага рэгулявання і гандлю супольна з Камітэтам дзяржкантролю выявілі картэльную змову ў сферы паставак сродкаў аховы раслін, пішуць naviny.online.

Як паведамляе прэс-служба МАРГ, «было праведзена маштабнае расследаванне на рынку сродкаў аховы раслін. Антыманапольнікам удалося давесці картэльную змову, удзельнікамі якой сталі 15 кампаній».

Падставай для пачатку расследавання паслужылі матэрыялы, прадстаўленыя ў МАРГ ўправай дэпартамента фінансавых расследаванняў Камітэта дзяржаўнага кантролю Віцебскай вобласці.

Стала вядома, што картэль дзейнічаў на тэрыторыі ўсёй краіны. Кампаніі рэалізоўвалі пэўныя стратэгіі паводзін. Так, на працягу 2020 года ўдзельнікі картэля падтрымлівалі цэны на таргах на пастаўку сродкаў аховы раслін.

Акрамя гэтага, быў выяўлены падзел таварнага рынку з боку ўсіх удзельнікаў картэля па коле спажыўцоў. Удзельнікі дамаўляліся, хто павінен стаць пераможцам у працэдурах закупак сродкаў аховы раслін. Пры гэтым былі вызначаныя і «цэнавыя парогі» - ніжэй якога цану нельга апускаць падчас таргоў.

МАРГ акцэнтуе ўвагу, што выдаткі на набыццё сродкаў аховы раслін складаюць значную дзель у сабекошце вытворчасці прадукцыі раслінаводства, таму іх набыццё завышаным коштам не магло не паўплываць на канчатковую цану прадукцыі ў далейшым як для перапрацоўшчыкаў, так і для насельніцтва.

Кожны ўдзельнік картэля падлягае прыцягненню да адміністрацыйнай адказнасці персанальна. Мінімальны штраф складае 400 базавых адзінак, пры гэтым кожнай кампаніі пагражае штраф да 10% ад сумы даходу ад рэалізацыі сродкаў аховы раслін за год.