Уладзімір Някляеў: Дыктатура гэтага не вытрымае, яны дарма ўпіраюцца

Тэндэнцыю станаўлення еўрапейскай беларускай годнай дзяржавы змяніць ужо немагчыма.

Беларускі паэт і палітык Уладзімір Някляеў даў вялікае інтэрв'ю Youtube-праекту «Жыццё-маліна». Уладзімір Някляеў верыць, што ў беларусаў захоўваецца пратэстны патэнцыял, а тэндэнцыю станаўлення еўрапейскай беларускай годнай дзяржавы змяніць ужо немагчыма, піша «Салiдарнасць».

- Я таксама быў уражаны і шчаслівы ад таго, што ўсё, што я бачыў на вуліцах і плошчах, адбывалася рэальна. Я вельмі ўдзячны ўсім людзям, якія на гэта пайшлі і зрабілі гэта. Адбылася рэвалюцыя свядомасці. Свядомасць змянілася не толькі ў тых, хто выйшаў з бел-чырвона-белымі сцягамі, але і ў тых, хто стаяў насупраць іх. Яны проста не могуць зараз гэта паказаць, але гэта так. І гэты працэс ужо незваротны.

Тое, што цяпер яны ўпіраюцца, толькі тармозіць і стварае праблемы. Але змяніць гэты рух або перанакіраваць яго ў адваротны бок ужо немагчыма. Яго можна секчы, знішчаць кагосьці персанальна, але саму тэндэнцыю станаўлення еўрапейскай беларускай годнай дзяржавы змяніць ужо немагчыма, - мяркуе грамадска-палітычны дзеяч.

Ён упэўнены, што пратэстны патэнцыял у Беларусі застаўся, і выказаў меркаванне, што можа адбыцца ў найбліжэйшай будучыні.

- Дыктатура гэтага не вытрымае, яны дарма ўпіраецца. Я хацеў бы, каб усё скончылася ў гэтым годзе, але я не бачу таго, што можа здарыцца ў найбліжэйшай будучыні, каб акумуляваць гэты выбух. Павінен з'явіцца дэтанатар. Звычайна ў такіх сітуацыях, у першую чаргу, спрацоўваюць эканамічныя дэтанатары. Дапусцім, няма чаго есці, як гэта было ў 1991 годзе, калі выйшлі рабочыя.

Але пры такім стаўленні Расеі, як цяпер, я не думаю, што зможа паўстаць сітуацыя, калі рабочым могуць не даць заробак. Значыць, павінна адбыцца нешта іншае, і я адчуваю інтуітыўна, што нешта здарыцца.