Прэм'ер Італіі адмовіўся ад заробку €110 тысяч

Ён заявіў, што атрымлівае дзве шчодрыя дзяржаўныя пенсіі.

Прэм'ер-міністр Італіі Марыё Драгі, які атрымлівае як мінімум дзве шчодрыя дзяржаўныя пенсіі, сказаў, што не будзе атрымліваць заробак за сваю працу ў якасці кіраўніка ўрада.

Пра гэта паведамляе «Еўрапейская праўда» са спасылкай на Euractiv.

Італійскія палітыкі абавязаныя публікаваць свае падатковыя дэкларацыі, і Драгі скарыстаўся выпадкам, каб абвясціць, што ён адмаўляецца ад заробку ў суме амаль 110 000 еўраў (сума да выліку падаткаў), на якую ён меў права як прэм'ер. Прычыны сваёй пастановы ён не назваў.

Падатковая дэкларацыя Драгі за 2020 год, апублікаваная позна ўвечары 13 траўня, паказала, што ён атрымаў даход у суме 583 470 еўраў у 2019 годзе.

Са слоў ягонага прадстаўніка, 498 144 еўраў з гэтай сумы - гэта дзяржаўныя пенсіі, якія ён атрымлівае ад сваіх папярэдніх пасад генеральнага дырэктара Казначэйства і кіраўніка Банкам Італіі.

У падатковай дэкларацыі Драгі таксама ўказана, што ён валодае 10 дамамі ці аналагічнымі будынкамі, у тым ліку адным у Лондане, і шасцю надзеламі зямлі.

Масіміліяна Панарары, экспэрт у палітычных камунікацыях ва ўніверсітэце Unimercatorum, сказаў, што пастанова Драгі адмовіцца ад заробку, магчыма, была накіраваная на тое, каб прадэманстраваць салідарнасць з італійцамі, якія моцна пацярпелі ад эканамічнага спаду.

«Аднак гэта можна разглядаць як папулісцкі жэст, таму Драгі лепш бы растлумачыць сваю пастанову», - дадаў ён.

Драгі, якому цяпер 73 гады, было 54 гады, калі ён пакінуў казначэйства ў 2001 годзе, каб уладкавацца на кіроўную пасаду ў інвестыцыйным банку Goldman Sachs у Лондане. Яму было 64 гады, калі ён пакінуў Банк Італіі.

Італійскія СМІ паведамілі, што з 59 гадоў Драгі атрымліваў амаль 15 000 еўраў на месяц пенсіі казначэйства.

Папярэднік Драгі Джузэпэ Контэ атрымліваў на пасадзе прэм'ер-міністра блізу 90 000 еўраў, адмовіўшыся ад 20% таго, на што меў права.

Некалькі папярэдніх прэм'ер-міністраў Італіі, у тым ліку Паола Джэнцілоні ў 2016-2018 гадах і Энрыка Лета ў 2013-2014 гадах, не атрымлівалі заробак, бо, у адрозненне ад Драгі, яны таксама былі дэпутатамі, а італійскае заканадаўства забараняе атрымліваць даход ад дзвюх пасад адначасова.