СБУ выкрыла ў Адэсе прапуцінскіх агітатараў і ботаферму, якія рыхтавалі правакацыі да 9 траўня
7- 8.05.2021, 15:13
- 7,970
Планавалася, што «сюжэты» будуць асвятляць у расейскіх СМІ.
Служба бяспекі Украіны выкрыла і спыніла працу сеткі ботаферм і інтэрнэт-агітатараў, якія нібыта хацелі дэстабілізаваць сітуацыю ў Адэсе на травеньскія святы.
Пра гэта паведаміла прэс-служба СБУ.
Паводле звестак спецслужбы, пяцёра жыхароў Адэсы распаўсюджвала фэйкавую інфармацыю, каб распаліць міжнацыянальную варожасць і прапаганду сепаратызму. Зламыснікі выконвалі заказ куратараў на здымку, публікацыю і распаўсюд ілжывай інфармацыі аб сітуацыі ва Украіне. Як адзначае СБУ, планавалася, што сюжэты будуць асвятляць у расейскіх СМІ, што стварыла б «патрэбную інфармацыйную карцінку» напярэдадні і падчас травеньскіх святаў.
СБУ спыніла працу «ботафермы», якую фінансавалі з Расеі
У спецслужбе дадаюць, што праз сацсеткі яны распаўсюджвалі матэрыялы, у якіх заклікалі парушыць тэрытарыяльную цэласнасць і канстытуцыйны лад Украіны.
Падчас ператрусаў па месцы жыхарства зламыснікаў супрацоўнікі СБУ знайшлі друкаваныя выданні, сімволіку з прапагандай таталітарнага рэжыму, а таксама іншую забароненую заканадаўствам прадукцыю. Паводле версіі следства, яны планавалі распаўсюджваць гэта падчас масавых травеньскіх мерапрыемстваў.
Акрамя таго, работнікі СБУ заблакавалі ў Адэсе працу ботафермы. Яе выкарыстоўвалі для распаўсюджвання ў інфармацыйнай прасторы антыўкраінскіх і іншых супрацьпраўных заклікаў. Падчас правядзення ператрусу праваахоўнікі выявілі і канфіскавалі кампутарную тэхніку з усталяваным спецыялізаваным праграмным забеспячэннем, а таксама тэлекамунікацыйнае абсталяванне.
Праваахоўнікі адкрылі справу паводле ч. 2 арт. 110 (замах на тэрытарыяльную цэласнасць і недатыкальнасць Украіны) Крымінальнага кодэкса Украіны. Зараз працягваюцца следчыя дзеянні.