У Індыі на фоне COVID-пандэміі пачасціліся выпадкі паразы людзей небяспечнымі грыбамі

Яго прыкметамі з'яўляюцца некратычныя паразы ў носе.

Пакуль у Індыі прадаўжае бушаваць другая хваля каранавіруса, які забраў жыцці ўжо больш чым 242 тысяч жыхароў краіны, мясцовыя лекары ўсё часцей фіксуюць выпадкі мукорамікоза. Гэта інфекцыя, якая выклікаецца разнастайнымі відамі грыбоў сямейства мукоравых.

Як адзначае BBC, хвароба, якую часам называюць чорнай цвіллю (black fungus, у расейскай мове чорнай цвіллю называюць цвіль, якая ўзнікае ў волкіх памяшканнях праз іншыя віды грыбка, які не мае дачынення да мукорамікозу), часта сустракаецца сярод пацыентаў з COVID-19 або сярод тых, хто ачуняў пасля каранавіруса.

Мукорамікоз - гэта рэдкае захворванне, яго прыкметамі з'яўляюцца некратычныя паразы ў носе і на нёбе, якія выклікаюць боль і ліхаманку. Акрамя таго, магчымыя сімптомы з боку цэнтральнай нервовай сістэмы, пацыенты скардзяцца на пухліну і боль у вачах. Хвароба паражае насавыя пазухі, мозг і лёгкія. Яна смяротна небяспечная для хворых на дыябет а таксама для хворых на ВІЧ/СНІД і на рак. Смяротнасць ад мукорамікоза можа дасягаць 50%, пішуць журналісты.

Узбуджальнікамі захворвання з'яўляюцца розныя грыбы, якія сустракаюцца ў глебе, раслінах, кампостах, гнілых гародніне і садавіне. Індыйскія медыкі адзначаюць, што сляды грыбоў можна знайсці ў насаглотцы і на слізістых здаровых людзей.

Выданне прыводзіць меркаванне індыйскага лекара Акшая Наіра з Мумбаі, які мяркуе, што рост захворвання на мукорамікоз можа быць выкліканы выкарыстаннем стэроідаў пры лячэнні цяжкіх формаў каранавіруса.

Стэроіды зніжаюць запаленне ў лёгкіх, але ў той жа час яны зніжаюць імунітэт і могуць падняць узровень цукру ў крыві. Індыйскія медыкі фіксуюць, што на мукорамікоз захворваюць прыкладна праз 12-15 дзён пасля акрыяння ад COVID-19.

Выданне цытуе Наіра, які працуе адразу ў трох шпіталях Мумбаі і сустрэў ужо амаль 40 выпадкаў паражэння мукорамікозам у красавіку. Многія з захварэлых - дыябетыкі, заразіліся каранавірусам. Адзінаццаці з іх давялося хірургічна выдаляць вочы праз грыбковую інфекцыю, каб яна не пашырылася ў мозг.

У Мумбайскай лякарні ў раёне Сіён за два месяцы было выяўлена 24 выпадкі мукорамікоза, тады як раней фіксавалася не больш за шэсць эпізодаў за год.