Пуцін набыў сабе чэмпіянат Еўропы?

Паміж УЕФА і «Газпрамам» падпісаны шматмільённы кантракт.

"Пасля таго, як у сераду Расейскаму футбольнаму саюзу ўдалося дамагчыся ад УЕФА забароны на патрыятычны дызайн футболак украінскіх удзельнікаў чэмпіянату Еўропы, у пятніцу стала вядома, што Расея адмаўляе крытычна настроенаму спартыўнаму журналісту тэлеканала ARD Робэрту Кэмпу ў акрэдытацыі на матчы ў Санкт-Пецярбургу - і , адпаведна, ва ўездзе ў аўтарытарную краіну Пуціна", - піша нямецкі таблоід Bild (пераклад - inopressa.ru).

"Але чаму пуцінская Расея за некалькі дзён да пачатку чэмпіянату Еўропы дзейнічае так самаўпэўнена і бесцырымонна ў дачыненні да сваіх спаборнікаў, і псуе ім задавальненне ад футбола? Магчыма, адказ хаваецца ў шматмільённым кантракце паміж УЕФА і расейскай дзяржаўнай газавай кампаніяй "Газпрам", які быў падпісаны ўсяго тры тыдні таму", - мяркуе выданне.

19 траўня "Газпрам" і УЕФА абвясцілі аб тым, што яны дамовіліся аб спонсарскім кантракце для турніраў УЕФА для каманд. (...) У адказ на пытанне Bild УЕФА не стаў раскрываць, на колькі мільёнаў еўраў было ўкладзенае спонсарскае пагадненне з расейскім газавым гігантам. (...) Але інсайдэры мяркуюць, што УЕФА ўсміхнуўся поспех у выглядзе не менш як 50 млн еўраў. Менавіта столькі каштавала кітайскай кампаніі Hisense спонсарская падтрымка чэмпіянату Еўропы ў Францыі ў 2016 годзе", - гаворыцца ў публікацыі.

"Характэрна, што "Газпрам Арэна" ў Санкт-Пецярбургу прыме цэлых сем матчаў чэмпіянату Еўропы. Больш, чым усе астатнія 10 стадыёнаў-удзельнікаў, за выключэннем стадыёна "Уэмблі" ў Лондане, - паказвае выданне. - (...) У інтэрв'ю Bild прадстаўнік УЕФА выключыў сувязь паміж спонсарскім пагадненнем і вялікай колькасцю матчаў у Расеі. (...) Пры гэтым на сайце УЕФА (!) цалкам без сарамлівасці гаворыцца: "Санкт-Пецярбург, дзе знаходзіцца штаб-кватэра "Газпрама", прызнаны годным прымаць заключны этап Трофі-тура УЕФА ЕЎРА-2020 21 і 22 траўня. Падчас летняга турніру Санкт-Пецярбург прыме сем матчаў".

"На думку ўкраінскай актывісткі ў барацьбе з карупцыяй Ганны Гапко, гэта не выпадкова. Паводле ейных слоў, угода паміж УЕФА і пуцінскім дзяржаўным канцэрнам "Газпрам" паказвае, "як аўтарытарныя рэжымы дыскрэдытуюць розныя арганізацыі з дапамогаю стратэгічнай карупцыі", - паведамляе выданне.

"Кіраўніком Расейскага футбольнага саюза з'яўляецца Аляксандр Дзюкаў, старшыня ўправы дзяржаўнага нафтавага канцэрна "Газпрам нафта", даччынай кампаніі новага спонсара чэмпіянату Еўропы "Газпрама". Толькі ў красавіку кіраўнік "Газпрама" быў абраны чальцом Выканаўчага камітэта УЕФА".

"Андрэй Мельнік, амбасадар Украіны ў Нямеччыне, мяркуе, што гэта не супадзенне. Ён сказаў у размове з Bild:" Той факт, што УЕФА задаволіў расейскую скаргу на нашы футболкі для чэмпіянату Еўропы ўсяго праз некалькі дзён пасля ўкладання спонсарскага пагаднення паміж еўрапейскай футбольнай асацыяцыі і расейскім дзяржаўным канцэрнам "Газпрам", больш чым падазрона".

"Прэзідэнт Пуцін, на думку пасла Мельніка, "зноў выкарыстоўвае "Газпрам" у якасці інструмента гібрыднай вайны з мэтай раскалоць Еўропу", - піша Bild.