Рэйтынг кіроўнай партыі Славакіі знізіўся да 8,2% пасля скандалаў з расейскай вакцынай
2- 14.06.2021, 10:13
- 2,186
Кіроўная партыя Славакіі працягвае страчваць рэйтынг, нягледзячы на нядаўнюю адстаўку Матовіча.
Кіроўная партыя Славакіі OĽANO далей страчвае рэйтынг, нягледзячы на нядаўнюю адстаўку Ігара Матовіча з пасады прэм'ер-міністра пасля скандалу з закупкай расейскай вакцыны "Спадарожнік V". Пра гэта паведамляе "Еўрапейская праўда" са спасылкай на Euractiv.
Апошнія апытанні ў чэрвені сведчаць пра падзенне рэйтынгу партыі да 8,2%, што з'яўляецца самым нізкім паказчыкам са студзеня 2020 года. Партыя стала нечаканым пераможцам на выбарах у лютым 2020 года, набраўшы 25% галасоў.
Рэзкае зніжэнне папулярнасці адлюстроўвае стаўленне да былога прэм'ер-міністра Ігара Матовічу, узровень даверу да якога значна ўпаў сярод выбарцаў.
Матовіч сышоў з пасады толькі пасля аднаго года на пасадзе на фоне палітычнага крызісу, які ўзнік у выніку яго канфрантацыйнага стылю палітыкі і стасункаў з Расіяй аб вакцыне "Спадарожнік V".
Партыя OĽANO не змагла палепшыць свае пазіцыі нават пасля таго, як Матовіч абмяняўся месцамі з былым міністрам фінансаў Эдуардам Гегерам.
На мінулым тыдні стала вядома, што ўрад Славакіі не плануе закупляць новыя партыі расейскай вакцыны "Спадарожнік V" праз нізкую цікавасць да яе з боку славакаў.